ریاض: صنعتی شعبے میں سعودی عرب روز افزوں ترقی کررہا ہے، اس کے لیے سنجیدہ اقدامات کیے گئے ہیں۔ سعودی انڈسٹریل ڈیولپمنٹ فنڈ (ایس آئی ڈی ایف) نے کاروباری شعبے کو دور جدید کے تقاضوں کے مطابق ڈھالنے پر دو اعلیٰ طلائی ایوارڈ جیت لیے۔
مشرق وسطیٰ اور شمالی افریقا کے اسٹیو ایوارڈ خطے میں کاروباری شعبے میں جدت لانے کے اعتراف میں دیے جاتے ہیں۔
عرب نیوز کے مطابق سعودی فنڈ نے ایک انعام کاروباری معلومات میں بہتری لانے، ویب سائٹس اور تمکین ایپ بنانے پر حاصل کیا ہے جس کے ذریعے قرضوں کے لیے درخواست دی جاتی ہے جب کہ دوسرا طلائی انعام سعودی انڈسٹریل ڈیولپمنٹ فنڈ کی جانب سے اس کے کلائنٹس کے لیے موبائل ایپ بنانے پر دیا گیا۔
ڈیجیٹل تبدیلی کی طرف جانے سے تسلیم شدہ قرضوں کی تعداد میں اضافہ ہونے کے ساتھ، اس کی استعداد کو بڑھانے اور قرضوں کے عمل کی جانچ پڑتال میں بھی آسانی ہوئی ہے اور قرضوں کی وصولی کے دورانیے کو 11 سے کم کرکے پانچ ماہ پر لایا گیا ہے جو بین الاقوامی معیار کے مطابق ہے۔
سونے، چاندی اور کانسی کے انعامات جیتنے والوں کا تعین اوسط نمبرز پر ہوتا ہے جو عالمی سطح پر 60 ماہرین چھ جیوریز کے ذریعے جاری کرتے ہیں۔