ٹک ٹاک ترجیح، نوجوان نسل سنیما جانا نہیں چاہتی، جنت مرزا

لاہور: ٹک ٹاک اسٹار جنت مرزا نے اپنے انٹرویو میں اعتراف کیا ہے کہ سنیما کے مقابلے میں ان کا انتخاب ٹک ٹاک ہے۔ اداکارہ نے اپنے اس انتخاب کی بہت دلچسپ وجہ بیان کی ہے۔
جنت مرزا پاکستان کی مقبول ترین ٹک ٹاکر ہیں اور ان کے انسٹاگرام فالوورز کی تعداد 10 ملین سے زیادہ ہے۔ ٹک ٹاکر نے سید نور کی فلم ”تیرے باجرے دی راکھی“ سے اپنے فلمی کیریئر کا آغاز کیا تھا، لیکن یہ فلم ناکامی سے دوچار ہوئی تھی۔
اپنی پہلی فلم کی ناکامی کے بعد جنت نے ماڈلنگ پر توجہ دی ہے اور سوشل میڈیا پر مصروف ہیں۔ انہوں نے سنیما کے مقابلے میں ٹک ٹاک کے انتخاب کی وجہ بتاتے ہوئے کہا کہ آج کے نوجوان گھر میں رہ کر ٹک ٹاک کے ذریعے اسکرول کرنا چاہتے ہیں اور جب چاہیں وہاں مجھے دیکھ سکتے ہیں۔ اس لیے وہ سنیما کے مقابلے میں ٹک ٹاک کے انتخاب کو ترجیح دیتی ہیں۔
انہوں نے مزید کہا کہ نوجوان نسل سنیما جانا نہیں چاہتی کیونکہ وہ آرام سے اپنے گھر میں موبائل استعمال کرنا پسند کرتی ہے۔ جب کہ سنیما کے ٹکٹس مہنگے ہیں جسے ایک شخص پوری فیملی کے لیے خریدنا افورڈ نہیں کرسکتا ہے۔