کراچی ایکسپو سینٹر میں تیسری عالمی فوڈ اینڈ ایگریکلچر نمائش

کراچی: ایکسپو سینٹر میں تیسری بین الاقوامی فوڈ اینڈ ایگریکلچر نمائش کا افتتاح وفاقی وزیرِ تجارت جام کمال خان نے کردیا۔
یہ نمائش تین روز جاری رہے گی، یہ ملکی سطح پر فوڈ اینڈ ایگریکلچر کی سب سے بڑی بین الاقوامی نمائش ہے۔
وفاقی وزیر تجارت جام کمال خان نے نمائش کا افتتاح کرتے ہوئے کہا کہ افغانستان سے تجارت نہیں، پاکستان کی سیکیورٹی اور استحکام ہماری اولین ترجیح ہے۔ ہر چیز ڈالر نہیں ہوتی۔ ہمارا افغانستان سے بڑا کنسرن ہے کہ آپ کی سرزمین پاکستان کے خلاف استعمال نہ ہو۔ اس میں کون سی غلط بات ہے، سیکیورٹی نہیں ملتی تو مجبوراً پاکستان اقدامات کرے گا۔
انہوں نے کہا کہ بحیثیت پاکستانی پہلی ترجیح سیکیورٹی اور تحفظ ہونا چاہیے۔ افغانستان سیکیورٹی اقدامات کرے گا تو ہماری طرف سے بھی مثبت اقدام نظر آئے گا۔ جام کمال نے کہا کہ نمائش میں مزید لوگوں کو لانا ہے۔ یورپ، بحرین، آسیان، چین، افریقا، امریکا، کینیڈا سمیت ملک بھر سے لوگ شریک ہیں۔ 800 سے زائد غیر ملکی مندوبین شرکت کررہے ہیں، انہیں پاکستان میں بڑا پوٹینشیل نظر آرہا ہے۔
انہوں نے کہا کہ پاکستانی کمپنیوں نے گزشتہ برسوں میں بڑی اچھی کارکردگی دکھائی ہے۔ پاکستانی مصنوعات کی کوالٹی بہترین ہے۔ بیرون ممالک نے پاکستانی مصنوعات کو اسپیس دیا ہے۔ مجموعی طور پر چیلنجز کو دیکھ رہے ہیں۔ افراط زر اور شرح سود میں کمی آئی ہے۔ وزیراعظم نے برآمد کنندگان کے لیے ای ایف ایس سرچارج سے متعلق بڑا فیصلہ کیا ہے۔
انہوں نے مزید کہا کہ مختلف ملکوں کے ساتھ پرانے ایف ٹی ایز پر دوبارہ بات چیت جاری ہے۔ افریقا کی مارکیٹ نئی ہے، اچھی پیش رفت ہے۔ بنگلادیش کے ساتھ دوبارہ تجارت بحال ہونا خوش آئند ہے۔ کسی ملک کے لیے میکرو استحکام سب سے زیادہ اہم ہے۔ ہم مائیکرو اور میکرو اکنامک پر توجہ دے رہے ہیں۔ پہلی بار ہے کہ کسی وزیراعظم نے انڈسٹری کے ساتھ اتنی انٹرایکشن کی۔