لاہور: وزیراعلیٰ پنجاب مریم نواز کے صاحبزادے جنید صفدر کی دوسری شادی کی تیاریاں عروج پر ہیں اور ان کی شادی اگلے ماہ یعنی جنوری میں ہونا قرار پائی ہے۔
قومی اسمبلی کے سابق رکن شیخ روحیل اصغر نے ایک حالیہ انٹرویو کے دوران تصدیق کی ہے کہ جنید صفدر کی شادی ان کی پوتی شانزے سے طے ہوئی ہے۔
رشتے کی تفصیلات بتاتے ہوئے روحیل اصغر نے کہا میری پوتی شانزے مریم کی چھوٹی بیٹی ماہ نور کی بہترین دوست ہے، دونوں کا ایک دوسرے کے گھر آنا جانا بھی بہت ہے، تو وہیں سے ان لوگوں نے میری پوتی کو پسند کیا۔
روحیل اصغر نے کہا ایک دن مریم وغیرہ کا میرے بیٹے کو پیغام آیا کہ ہم آپ کی طرف آنا چاہ رہے ہیں، پھر وہ لوگ آئے، اس کے بعد ہم گئے اور یوں رشتہ پکا ہوگیا۔
انہوں نے کہا دو تین ماہ پہلے یہ سب ہوا اور شادی کی تاریخ طے ہوئی۔
شادی کی تاریخوں کے حوالے سے روحیل اصغر نے بتایا کہ جنوری کی 17 ،16 اور 18 کو شادی ہوگی اور کافی دھوم دھام سے ہوگی۔
روحیل اصغر نے کہا شادی پر صرف قریبی لوگوں کو ہی مدعو کیا گیا ہے۔
خیال رہے کہ جنید صفدر نے اکتوبر 2023 میں اپنے انسٹاگرام اکاؤنٹ پر پہلی اہلیہ سے طلاق کی تصدیق کی تھی۔