واشنگٹن: امریکا نے براؤن یونیورسٹی پر فائرنگ کے واقعے کے بعد گرین کارڈ لاٹری پروگرام معطل کرنے کا اعلان کردیا۔
امریکا کی سیکریٹری ہوم لینڈ سیکیورٹی کرسٹی نویم نے کہا کہ براؤن یونیورسٹی میں فائرنگ کرنے والے مشتبہ شخص نے امریکا آنے کے لیے گرین کارڈ لاٹری پروگرام کا استعمال کیا تھا۔
امریکا کا گرین کارڈ لاٹری پروگرام دراصل ڈائیورسٹی ویزا (Diversity Visa – DV) پروگرام کہلاتا ہے، یہ امریکی حکومت کا ایک سرکاری امیگریشن پروگرام ہے، جس کا مقصد دنیا کے اُن ممالک کے شہریوں کو امریکا میں مستقل رہائش کا موقع دینا ہے، جہاں سے امریکا میں امیگریشن کی شرح کم رہی ہو۔
اس پروگرام کے تحت ہر سال قریباً 50 ہزار افراد کو قرعہ اندازی کے ذریعے گرین کارڈ دیا جاتا ہے، جس سے وہ امریکا میں مستقل طور پر رہ سکتے ہیں، کام کرسکتے ہیں اور بعد میں شہریت کے اہل ہوسکتے ہیں۔
خیال رہے کہ چند روز قبل براؤن یونیورسٹی اور ایم آئی ٹی میں فائرنگ کا واقعہ پیش آیا تھا، ملزم پرتگالی شہری کلاڈیو مانوئل نیویس ویلینتے 2017 میں ڈائیورسٹی ویزا لاٹری پروگرام کے تحت امریکا آیا تھا اور اسے گرین کارڈ دیا گیا تھا۔
48 سالہ نیویس پر الزام ہے کہ اس نے براؤن یونیورسٹی میں فائرنگ کرکے 2 طلبہ کو ہلاک اور 9 افراد کو زخمی کیا جب کہ اس واقعے میں ایک ایم آئی ٹی پروفیسر بھی زندگی سے محروم ہوا۔