کراچی: پچھلے کچھ دنوں سے شہر کے مختلف دھرنوں کے باعث عوام کو شدید مشکلات کا سامنا ہے، منگل کو نمائش چورنگی پر صورت حال کشیدہ ہوگئی، پولیس نے آنسو گیس کی شیلنگ کی جب کہ مظاہرین کی جانب سے پولیس پر پتھراؤ کیا گیا۔
نمائش چورنگی پر ایک گاڑی کو آگ لگادی گئی، مظاہرین کی جانب سے پولیس اہلکاروں کی 6 موٹرسائیکلیں جلادی گئیں جب کہ پولیس چوکی بھی نذرآتش کردی گئی۔
مظاہرین کی جانب سے پولیس موبائل کے شیشے بھی توڑے گئے ہیں، مظاہرین کے پتھراؤ سے پولیس اہلکار زخمی بھی ہوئے۔
پولیس نے متعدد مظاہرین کو حراست میں لے لیا جب کہ پولیس نے نمائش چورنگی پر موجود کیمپ بھی اکھاڑ دیا ہے۔