اسلام آباد: پاکستانی مصنف، اداکار و فلم ساز صائم صادق کی فلم جوائے لینڈ، جس نے عالمی سطح پر ناصرف خوب پذیرائی حاصل کی، بلکہ ایوارڈ بھی جیتے، اس کی ریلیز پاکستان میں پابندی عائد کردی گئی ہے۔
وزارت اطلاعات و نشریات نے متعدد شکایات موصول ہونے پر ملک بھر کے سنیما گھروں میں عالمی ایوارڈ یافتہ فلم جوائے لینڈ کی نمائش پر پابندی عائد کردی۔
ماریہ بی نے سوشل میڈیا پر اپنے پیغام میں فلم جوائے لینڈ کی پاکستان میں ریلیز پر پابندی کا مطالبہ کرتے ہوئے کہا تھا کہ صائم صادق کی فلم خواجہ سراؤں کے حقوق کے لیے نہیں بلکہ اسلامی معاشرے میں ہم جنس پرستی کو فروغ دینے کے لیے ہے۔
اس سے قبل فلم کا ٹریلر سامنے آنے کے بعد جماعت اسلامی کے سینیٹر مشتاق احمد خان نے بھی فلم پر پابندی کا مطالبہ کرتے ہوئے اپنی ٹوئٹ میں دعویٰ کیا تھا، فلم میں ہم جنس پرستی کو فروغ دینے کی کوشش کی گئی ہے اور ایسی فلموں کے ذریعے پاکستان کے معاشرتی اقدار پر حملہ کرنے کی منصوبہ بندی کی گئی ہے۔
فلم کی کہانی ایک نوجوان اور ٹرانس جینڈر کے گرد گھومتی ہے جو ڈانس کلب میں ملازمت کے دوران ایک دوسرے کی محبت میں گرفتار ہوجاتے ہیں۔ فلم کو کانز فلم فیسٹیول میں ’کانز: کوئیر پام‘ ایوارڈ سے نوازا گیا تھا جو خصوصی طور پر ہم جنس پرست یا پھر مخنث افراد کی کہانیوں پر مبنی فلموں کو دیا جاتا ہے۔
عالمی اعزاز جیتنے والی پاکستانی فلم جوائے لینڈ کے حوالے سے ٹوئٹر پر دو ٹرینڈز سامنے آرہے ہیں، گزشتہ روز بین جوائے نے ٹرینڈ کیا تو آج ریلیز جوائے لینڈاور ماریہ بی کا نام ٹوئٹر پر ٹرینڈ کررہا ہے۔
تاہم متعدد شکایات موصول ہونے کے بعد وزارت اطلاعات ونشریات نے فلم جوائے لینڈ کی ملک بھر کے سنیما میں نمائش پر پابندی عائد کرتے ہوئے فلم کو جاری کردہ سنسربورڈ کا سرٹیفیکیٹ منسوخ کردیا ہے۔
صائم صادق کی ہدایت کاری میں بننے والی اس فلم کی کاسٹ میں سرمد کھوسٹ، ثروت گیلانی، علینا خان، سہیل سمیر، سلمان پیر، ثانیہ سعید، کنول کھوسٹ، زویا احسن، ثنا جعفری اور قاسم عباس سمیت دیگر اداکار شامل ہیں جو فلم کی پاکستان میں ریلیز کا مطالبہ کررہے ہیں۔ یاد رہے کہ پاکستان میں جوائے لینڈ کو رواں ماہ 18 نومبر کو ریلیز کیا جانا تھا۔