کراچی: پاکستان کے سپراسٹارز ماہرہ خان اور ہمایوں سعید کی فلم لَو گُرو کی ریلیز ہونے کی تاریخ سامنے آگئی، اداکارہ نے اس فلم کا پوسٹر بھی شیئر کردیا۔
ماہرہ خان اور شوبز انڈسٹری کے سپر اسٹار ہمایوں سعید کی جوڑی کو ایک ساتھ بے حد پسند کیا جاتا ہے۔ بن روئے ڈرامے اور اس کے فلمی حصے کے بعد اس جوڑی نے مداحوں کے دلوں میں گھر کرلیا اور آج بھی مداح انہیں ایک ساتھ دیکھنے کیلئے بے قرار ہیں۔
تاہم اب ان مداحوں کا انتظار ختم ہوا کیونکہ جلد یہ خوبصورت جوڑی ایک ساتھ بڑی اسکرین پر جلوہ گر ہوگی۔ ماہرہ خان نے فلم کا پوسٹر جاری کرتے ہوئے اس کی ریلیز کی تاریخ کا بھی اعلان کیا ہے۔
رومانوی کہانی پر مبنی فلم لَو گُرو رواں سال عیدالاضحیٰ کے موقع پر ریلیز کی جائے گی۔ اس فلم کے ہدایت کار معروف فلمساز ندیم بیگ ہیں۔
بن روئے اسٹارز نے اپنی اس نئی فلم کی عکس بندی پاکستان کے مختلف مقامات سمیت برطانیہ میں کی ہے۔ تاہم اس فلم کی اسٹوری کیا ہے، یہ اس کا ٹریلر سامنے آنے کے بعد ہی معلوم ہوسکے گا۔