دبئی: یو اے ای نے جدید ٹیکنالوجی کی دنیا میں ایک اور اہم کامیابی حاصل کرلی، دبئی میں اڑنے والی ٹیکسی کی پہلی آزمائشی پرواز کامیابی سے مکمل کرلی گئی۔
اماراتی حکام کے مطابق یہ آزمائشی پرواز دبئی اور العین کے درمیان مرغم کے صحرائی علاقے سے شروع ہوئی اور المکتوم ایئرپورٹ پر کامیابی سے اختتام پذیر ہوئی۔
حکام کا کہنا ہے کہ یہ الیکٹرک ایئرٹیکسی 320 کلومیٹر فی گھنٹہ کی رفتار سے پرواز کرسکتی ہے، جس میں 4 مسافروں کے بیٹھنے کی گنجائش ہے۔ یہ مکمل طور پر ماحول دوست ہے اور عام فضائی گاڑیوں کے مقابلے میں شور بھی نہ ہونے کے برابر پیدا کرتی ہے۔
اماراتی حکومت نے اعلان کیا ہے کہ 2026 میں ایئر ٹیکسی سروس عوام کے لیے باقاعدہ طور پر شروع کی جائے گی جب کہ شہری علاقوں میں مزید تجرباتی پروازوں کا شیڈول بھی تیار کیا جارہا ہے۔
اسکائی پورٹس کمپنی دبئی انٹرنیشنل ایئرپورٹ کے قریب پہلا ایئر ٹیکسی اسٹیشن قائم کررہی ہے۔