کراچی: وزیراعلیٰ سندھ مراد علی شاہ نے کراچی کی سڑکوں کی تعمیر کے لیے 25 ارب روپے کی منظوری دے دی۔
وزیراعلیٰ ہاؤس میں مراد علی شاہ کی زیر صدارت اجلاس میں کراچی میں جاری ترقیاتی منصوبوں سے متعلق معاملات کا جائزہ لیا گیا۔ اجلاس میں وزیر بلدیات سید ناصر شاہ، میئر کراچی مرتضیٰ وہاب، چیف سیکریٹری آصف حیدر شاہ، پرنسپل سیکریٹری وزیراعلیٰ آغا واصف، سینئر ممبر بورڈ آف ریونیو خالد حیدر شاہ اور دیگر اہم افسران نے شرکت کی۔
وزیراعلیٰ سندھ مُراد علی شاہ نے شہر کی 315 اندرونی سڑکوں اور گلیوں کے ساتھ 60 بڑی سڑکوں کی تعمیر نو کے لیے 25 ارب روپے کی منظوری دیتے ہوئے کہا کہ شہریوں کو خستہ حال انفرا اسٹرکچر اور ٹریفک جام سے نجات دلانے میں فنڈز رکاوٹ نہیں ہوں گے، لیکن تعمیر نو کا کام فوری شروع ہونا ضروری ہے۔
ان کا کہنا تھا میں چاہتا ہوں کہ کام جنگی بنیادوں پر مکمل ہوں، سیف سٹی منصوبے کے نفاذ سے شہر میں ٹریفک حادثات میں کمی آئی ہے۔