کینبرا: آسٹریلوی وزیراعظم انتھونی البانیز دوسری بار شادی کے بندھن میں بندھ گئے۔ انہوں نے جوڈی ہیڈن سے شادی کرلی۔
میڈیا رپورٹس کے مطابق انتھونی البانیز اور جوڈی ہیڈن کی شادی 29 نومبر 2025 کو وزیراعظم کی سرکاری رہائش پر نجی تقریب میں ہوئی۔
یہ پہلی بار ہے کہ کوئی برسرِاقتدار آسٹریلوی وزیراعظم اپنی مدتِ اقتدار کے دوران شادی کررہا ہے۔ یہ شادی کی تقریب عوامی نہیں تھی بلکہ شادی میں صرف قریبی دوست اور رشتہ دار موجود تھے۔
تقریب میں دلہن خوبصورت اور نفیس سے سفید گاؤن میں نظر آئیں اور دولہا یعنی وزیراعظم نیوی بلیو سوٹ میں ملبوس تھے۔
اس موقع پر ان کا پالتو کتا ٹوٹو بھی موجود تھا جو ’ring-bearer‘ یعنی انگوٹھی کی حفاظت کی ذمے داریاں سنبھال رہا تھا۔
تقریب میں موسیقی اور ایک خاص طور پر تیار شدہ شراب پیش کی گئی۔ تقریب، نجی اور ذاتی انداز کی تھی۔
واضح رہے کہ انتھونی البانیز کی پہلی شادی سیاسی شخصیت کارمیل تیبت سے 2000 میں ہوئی تھی، یہ شادی 2019 میں اپنے اختتام کو پہنچی۔ انتھونی البانیز کی دوسری اہلیہ جوڈی ہیڈن پیشے کے لحاظ سے وکیل ہیں۔