لوئر کرم: مسافر گاڑی پر نامعلوم افراد کے حملے میں 6 افراد جاں بحق ہوگئے۔
پولیس کے مطابق ضلع کرم میں لوئر کرم کے علاقے احمد خان کلے میں پاڑہ چمکنی سے صدہ جانے والی گاڑی پر نامعلوم افراد نے خودکار ہتھیاروں سے حملہ کیا، جس کے نتیجے میں 6 افراد بحق ہوگئے، جن کی لاشیں قریبی اسپتال منتقل کردی گئیں۔
پولیس کا کہنا ہے کہ فوری فائرنگ کی وجہ معلوم نہ ہوسکی، تاہم واقعے کی تحقیقات کی جارہی ہے اور علاقے میں پولیس کی بھاری نفری پہنچ گئی ہے۔
کرم سے رکن قومی اسمبلی انجینئر حمید حسین نے واقعے کی مذمت کرتے ہوئے کہا ہے کہ احمد خان کلے جیسے پُرامن علاقے میں اس قسم کا واقعہ سمجھ سے باہر ہے اور یہ علاقے میں منظم سازش کے تحت بدامنی پھیلانے کی کوششیں ہے، عوام اس سازش کو ناکام بناکر قیام امن کے لیے راہ ہموار کریں۔
دوسری جانب طوری بنگش قبائل کے رہنماؤں نے واقعے کی مذمت کرتے ہوئے حکومت سے واقعے کی فوری تحقیقات اور ملوث عناصر کے خلاف کارروائی کا مطالبہ کیا ہے۔