لاہور: ٹی وی کے سینئر اداکار توقیر ناصر نے نئے اداکاروں کو نصیحت کردی۔
توقیر ناصر نے پاکستان ٹیلی وژن (پی ٹی وی) کے سنہرے دور میں کام کیا اور 500 سے زائد رولز کیے جب کہ انہیں 1999 میں حکومت کی جانب سے تمغہ امتیاز سے بھی نوازا جاچکا ہے۔
حال ہی میں سینئر اداکار نے ایک نجی ٹی وی کے مزاحیہ پروگرام میں شرکت کی، جہاں انہوں نے اداکاری کے ساتھ پی ٹی وی کے دور کو یاد کیا۔
اداکار نے ماضی کی یاد کو تازہ کرتے ہوئے بتایا کہ ہم خوش قسمت تھے، ہمیں اشفاق احمد اور یاور حیات کے ساتھ کام کرنے کا موقع ملا، وہ ہمارے ساتھ بیٹھ کر ہمیں سکھاتے اور سختی سے ریہرسل کرواتے تھے۔
توقیر ناصر نے کہا کہ اب کے دور میں اداکار ریہرسل نہیں کرتے اور آسان راستوں کی طرف جاتے ہیں، آج کل لڑکیاں میک اپ پر 2 گھنٹے لگاتی ہیں، اگر وہ اسکرپٹ پر وقت لگائیں تو زیادہ اچھا کام نظر آئے گا۔