سعودیہ میں غیر ملکی عازمین حج کی رجسٹریشن کا آغاز

ریاض: غیر ملکی عازمین حج 2024 کے لیے سعودی عرب نے باضابطہ رجسٹریشن شروع کرنے کا اعلان کردیا۔
بین الاقوامی خبر رساں ادارے کے مطابق سعودی وزارت حج و عمرہ نے دنیا بھر سے آنے والے عازمین حج اور ان کے اہل خانہ کی رجسٹریشن کے لیے درخواستیں ایپ نسخ حج کے ذریعے وصول کرنا شروع کردیں۔
سعودی وزارت حج و عمرہ نے اپنے بیان میں کہا کہ ایشیا، افریقا، یورپ، شمالی امریکا، جنوبی امریکا اور اوشیانا کے براعظموں کے عازمین ’’نسخ حج‘‘ کے ذریعے درخواست دے سکتے ہیں۔
وزارت حج و عمرہ نے یہ ہدایت بھی کی ہے کہ حج کی رجسٹریشن کے بارے میں مزید تفصیلات hajj.nusuk.sa کی ویب سائٹ سے حاصل کی جاسکتی ہیں۔
عازمین ایک ای میل ایڈریس کے ساتھ اپنا ذاتی اکاؤنٹ بنانے کے بعد ویب سائٹ کے ذریعے اپنے نام درج کرسکتے ہیں اور فراہم کردہ فہرست سے اپنے ملک کا نام منتخب کرسکتے ہیں۔
خیال رہے کہ نسخ حج ایک ون اسٹاپ شاپ پلیٹ فارم ہے، جس کی نگرانی وزارت حج و عمرہ کرتی ہے۔ یہ حجاج کرام کو مختلف قسم کے حج پیکیجز کی پیش کش کرتا ہے جو یہ سروس فراہم کرنے والی کمپنیوں کی جانب سے پیش کیے جاتے ہیں۔
گزشتہ برس ہونے والا حج کورونا وبا کے بعد پہلا حج تھا جس میں دو سال کے وقفے کے بعد بیرون ملک سے حاجیوں کو آنے کی اجازت دی گئی تھی اور 18 لاکھ 45 ہزار سے زائد عازمین حج نے فریضہ ادا کیا تھا جن میں 16 لاکھ اور 60 ہزار 900 سے زائد حاجی بیرون ملک سے سعودی عرب پہنچے تھے۔