کراچی: شہر قائد میں تیز رفتار ڈمپر نے ایک موٹر سائیکل پر سوار 3 نوجوانوں کو کچل دیا۔
رپورٹ کے مطابق کورنگی ابراہیم حیدری سے کراسنگ جاتے ہوئے تیز رفتار ڈمپر نے موٹر سائیکل کو کچلا، جس کے نتیجے میں 3 نوجوان جاں بحق ہوگئے۔
حادثے کے بعد موقع پر موجود شہری مشتعل ہوگئے اور ڈمپر کو آگ لگادی، جاں بحق افراد کو جناح اسپتال منتقل کردیا گیا۔
حادثے کی اطلاع ملنے پر پولیس کی بھاری نفری موقع پر پہنچی اور مشتعل افراد کو موقع سے ہٹانے کی کوشش کی، ڈمپر کا ڈرائیور فرار ہوگیا، جس کی تلاش شروع کردی گئی ہے۔
موقع پر موجود شہری نے کہا کہ ڈمپر دن دیہاڑے رونگ سائیڈ تیز رفتاری کے ساتھ جارہا تھا، ریتی لے جانے والا حادثے کا ذمے دار ڈمپر ڈرائیور موقع سے فرار ہوگیا۔
کراچی میں ڈمپر ڈرائیورز نے حکومتی اقدامات اور دعوؤں کو ہوا میں اُڑادیا، حکومتی احکامات کے باجود دن کے اوقات میں بھی ڈمپرز اور بھاری گاڑیاں شہر کی سڑکوں پر دندناتی نظر آرہی ہیں۔
5 فروری کو ڈمپر ڈرائیورز کی لاپروائی سے میاں بیوی اور باپ بیٹے سمیت 5 افراد جان کی بازی ہار گئے تھے۔