بچپن میں والد ساتھ نہیں تھے، خود کو سکون دینے کیلئے والدین کو معاف کیا، سونیا

کراچی: پاکستانی ڈراموں اور فلموں کی مقبول اداکارہ سونیا حسین نے حالیہ انٹرویو میں اپنی ذاتی زندگی سے متعلق اہم انکشافات کیے ہیں۔
سونیا حُسین نے یوٹیوب شو ’فوشیا‘ میں گفتگو کرتے ہوئے اپنی زندگی میں برداشت کی گئی مشکلات، والدین کی علیحدگی، والد کی عدم موجودگی اور بطور بڑے بہن بھائی اپنی قربانیوں پر کھل کر بات کی۔
سونیا نے بتایا کہ بچپن میں ان کے والد زندگی میں موجود نہیں تھے، جس کی وجہ سے انہیں نہ صرف جذباتی صدمہ برداشت کرنا پڑا بلکہ ذہنی طور پر بھی وہ شدید متاثر ہوئیں۔
تاہم وقت کے ساتھ انہوں نے یہ سیکھا کہ، والدین بھی انسان ہوتے ہیں، ان سے بھی غلطیاں ہو سکتی ہیں۔ میں نے انہیں معاف کیا تاکہ خود کو سکون دے سکوں۔
سونیا حسین کے مطابق زندگی میں کئی بار یہ احساس ہوا کہ ہر مشکل ان کے ہی حصے میں کیوں آ رہی ہے۔
میں ہی کیوں؟ کیوں میں ہی سب کچھ برداشت کرنے والی ہوں؟ لیکن پھر انہوں نے جانا کہ معافی کا راستہ اپنانا اور دل سے بوجھ ہلکا کرنا ہی اصل نجات ہے۔
سونیا حسین نے انکشاف کیا کہ وہ اپنے خاندان میں سب سے بڑی اولاد ہیں اور یہ کردار اپنی جگہ ایک خاموش جدوجہد ہے۔ انہوں نے کہا کہ گھر میں سب سے بڑا ہونا ایک نعمت بھی ہے اور بوجھ بھی۔ آپ سے توقع کی جاتی ہے کہ آپ مضبوط رہیں، سب کا خیال رکھیں، اور کبھی کمزور نہ ہوں۔
انہوں نے بتایا کہ کئی بار انہیں والدین کے درمیان توازن بھی رکھنا پڑا اور بہن بھائیوں کے لیے ایک والدین جیسا کردار بھی ادا کرنا پڑا۔
سونیا حسین نے اپنے انٹرویو کے اختتام پر دل کو چھو لینے والا پیغام دیا۔ زندگی میں جب سکون ملنے لگے، تو اُسے گلے لگا لینا چاہیے۔ کیونکہ یہی اصل کامیابی ہے۔