لاہور: عدالت عالیہ نے اسموگ تدارک کیس میں نجی اداروں کے 50 فیصد ورکرز کو گھروں میں بیٹھ کر کام کرنے کا حکم دے دیا۔
عدالت نے پنجاب حکومت کو ہدایات جاری کی ہیں کہ حکومت فوری نوٹیفکیشن جاری کرے۔ لاہور ہائی کورٹ نے زیادہ ایئر کوالٹی انڈیکس والے علاقے میں اسکول بند کرنے کی جوڈیشل کمیشن کی سفارش سے اتفاق نہیں کیا۔
ہائی کورٹ میں اسموگ کے تدارک کے لیے دائر درخواست کی سماعت ہوئی۔ جوڈیشل کمیشن کے فوکل پرسن نے رپورٹ عدالت میں جمع کروادی۔ رپورٹ میں کہا گیا فصلوں کی باقیات جلانے والوں کے خلاف روزانہ کی بنیاد پر کارروائی کی جائے۔ ڈی جی پی ڈی ایم اے اور پٹواری صاحبان فصلوں کی باقیات کو جلانے والوں کی فوری اطلاع متعلقہ ڈپٹی کمشنر کو دیں۔
رپورٹ میں بتایا گیا فصلوں کی باقیات جلانے والوں کے دو ہزار ایک سو 90 کیسز سامنے آئے، جن میں سے 98 افراد کو جرمانہ کیا گیا۔ جوڈیشل کمیشن کی رپورٹ میں سفارش کی گئی کہ جن علاقوں میں 4 سو ایئر کوالٹی ہے وہاں فوری اسکولوں کو بند کروایا جائے اور آن لائن کلاسز کروائی جائیں جب کہ 500 ایئر کوالٹی انڈیکس والے علاقوں میں فوری طور پر فیکٹریوں کو بند کروایا جائے۔
رپورٹ میں مزید کہا گیا کہ پنجاب بھر میں 4 ہزار سات سو سے زائد اینٹوں کے بھٹوں کی انسپکشن کی گئی اور ماحول کو آلودہ کرنے والے بھٹوں کو 3 کروڑ 59 لاکھ سے زائد کے جرمانے کیے گئے جب کہ آلودگی پیدا کرنے والے دو سو 74 اینٹوں کو سیل کردیا گیا۔ بھٹہ مالکان کے خلاف سات سو 97 مقدمات درج کروائے گئے اور 22 بھٹہ مالکان کو فوری گرفتار کروایا گیا۔
رپورٹ میں انکشاف کیا گیا کہ پنجاب بھر میں 24 ہزار سے زائد گاڑیوں کی انسپکشن کی گئی۔ دھواں چھوڑنے والی 8 ہزار 3 سو سے زائد گاڑیوں کو وارننگ جاری کی گئی۔ زیادہ دھواں چھوڑنے والی پانچ ہزار سے زائد گاڑیوں کو 46 لاکھ سے زائد کے جرمانے کیے گئے اور دو ہزار 1 سو 83 فیکٹریوں کی انسپکشن کی گئی۔ آلودگی کم پیدا کرنے والے آلات نصب نہ کرنے والے 197 مالکان کے خلاف مقدمات درج کیے گئے۔ زیادہ دھواں چھوڑنے والی 245 فیکٹریوں کو مکمل سیل کردیا گیا۔
لاہور ہائی کورٹ نے اسموگ پر قابو پانے سے متعلق بڑا فیصلہ بھی دیا۔ جسٹس شاہد کریم نے نجی اداروں کے 50 فیصد ورکرز کو (ورک فرام ہوم) گھروں میں بیٹھ کر کام کرنے کا حکم دے دیا۔