سنگاپور: معروف گلوکار اور موسیقار زوبین گرگ اسکوبا ڈائیونگ کے دوران انتقال کر گئے۔
بھارتی میڈیا کے مطابق بولی وُڈ فلم گینگسٹر کے گانے یاعلی سے شہرت حاصل کرنے والے گلوکار و موسیقار زوبین گرگ سنگاپور میں اسکوبا ڈائیونگ کے دوران انتقال کرگئے۔ ان کی عمر 52 سال تھی۔
گلوکار زوبین آج سنگاپور میں نارتھ ایسٹ فیسٹیول میں پرفارم کرنے والے تھے۔
رپورٹس کے مطابق زوبین گرگ کو سنگاپور پولیس نے پانی سے نکال کر اسپتال منتقل کیا تھا، ڈاکٹروں نے انہیں آئی سی یو میں رکھا، لیکن وہ جانبر نہ ہوسکے۔
نارتھ ایسٹ فیسٹیول کے منتظمین نے ایک بیان میں کہا کہ بہت دکھ کے ساتھ ہم زوبین کے انتقال کی خبر شیئر کررہے ہیں۔ اسکوبا ڈائیونگ کے دوران انہیں سانس لینے میں دشواری پیش آئی، فوری سی پی آر دیا گیا اور اسپتال منتقل کیا گیا، لیکن تمام کوششوں کے باوجود وہ آئی سی یو میں دم توڑ گئے۔
زوبین کی اچانک موت نے ان کے مداحوں اور شوبز انڈسٹری کو صدمے میں ڈال دیا ہے۔
زوبین نے 2006 کی بولی وُڈ فلم گینگسٹر کے گانے یاعلی سے شہرت حاصل کی۔ اس کے علاوہ انہوں نے کئی مشہور گانے دیے، جس میں فلم کرش 3 کا گانا "دل تو ہی بتا” اور فلم پیار کے سائیڈ ایفیکٹس کا گانا "جانے کیا چاہے من’ وغیرہ شامل ہیں۔
زوبین نے ہندی کے ساتھ آسامی، بنگالی، نیپالی اور کئی دیگر زبانوں میں بھی گانے گائے ہیں۔