کراچی: مایہ ناز گلوکار علی حیدر نے انکشاف کیا ہے کہ ان کے لیے پاکستان میں رہنا غیر محفوظ ہوگیا تھا، اس لیے انہیں ملک چھوڑ کر جانا پڑا۔
گزشتہ دنوں کئی مقبول گیتوں کو گانے والے گلوکار علی حیدر ایک پوڈکاسٹ میں شریک ہوئے، جہاں انہوں نے موسیقی سے دور ہونے اور اپنی نجی زندگی کے حوالے سے کھل کر گفتگو کی۔
علی حیدر نے بتایا کہ انہوں نے پاپ میوزک چھوڑ کر نعتیں، حمد و ثنا اور منقبت پڑھنا شروع کردی تھی، گانوں کی طرف ان کا رجحان کم ہوگیا تھا، جس کے بعد ان کے لیے حالات مشکلات سے بھر گئے اور انہیں دھمکیاں موصول ہونے لگیں۔
گلوکار علی حیدر نے بتایا کہ ان کے والد کا پرنٹنگ پریس تھا، جو ان کو بند کرنا پڑا اور وہ گھر بیٹھ گئے، کیونکہ دھمکیوں کی وجہ سے وہ بھی غیر محفوظ اور ان کے اہل خانہ بھی، جس کے بعد ان کی والدہ نے پریشانی کا اظہار کرتے ہوئے انہیں ملک چھوڑ کر کہیں اور منتقل ہونے کا مشورہ دیا۔
انہوں نے بتایا کہ ایک پرانے دوست جن کے ہمراہ وہ کئی کنسرٹ کرچکے تھے، نے انہیں امریکا بُلالیا اور وہ کام کے لیے وہاں گئے، تاہم بیوی بچوں کے ساتھ وہیں سیٹل ہوگئے اور اب وہ وہاں ریڈیو شوز کرتے ہیں۔