امریکا میں ہیلووین تہوار پر فائرنگ سے 12 افراد ہلاک، 52 زخمی

واشنگٹن: ایسا لگتا ہے کہ خود کو سب سے مہذب ملک گرداننے والے امریکا میں بھی نامعلوم افراد نامی بلا پیدا ہوگئی ہے، تبھی تو وہاں فائرنگ کے واقعات کے نتیجے میں درجن بھر افراد اپنی زندگیوں سے محروم ہوگئے۔ بتایا جاتا ہے کہ امریکا میں ہیلووین کے تہوار کے موقع پر فائرنگ کے مختلف واقعات میں 12 افراد ہلاک اور 52 زخمی ہوگئے۔
امریکی نشریاتی ادارے کے مطابق ہیلووین تہوار کے موقع پر گزشتہ ہفتے امریکا کی مختلف ریاستوں میں فائرنگ کے مختلف واقعات پیش آئے جس کے نتیجے میں 12 افراد ہلاک اور 52 زخمی ہوگئے۔ زیادہ تر واقعات گھروں میں یا ان جگہوں پر پیش آئے جہاں ہیلووین پارٹی کے لیے لوگوں کی بڑی تعداد جمع تھی۔
امریکی حکام کے مطابق ملک میں کورونا وائرس کی لہر کے دوران فائرنگ کے واقعات میں اضافہ دیکھنے میں آیا ہے، رواں سال ابھی تک فائرنگ کے نتیجے میں 599 افراد ہلاک ہوئے جب کہ گزشتہ سال 611 اور 2019 میں 417 افراد جان سے ہاتھ دھو بیٹھے تھے۔