شہروز سبزواری نے اپنے اغوا کا خوف ناک قصہ بیان کرڈالا

کراچی: معروف اداکار شہروز سبزواری نے اغوا کار گینگ کے ساتھ خوف ناک تجربے کا انکشاف کیا ہے۔
عیدالفطر کی مناسبت سے شہروز سبزواری اپنی اہلیہ اور والدین کے ہمراہ نجی ٹی وی کے پروگرام میں شریک ہوئے۔
اس دوران شہروز نے ماضی میں اپنے ساتھ پیش آنے والے ایک خوف ناک واقعے کا انکشاف کرتے ہوئے بتایا کہ انہیں ایک مرتبہ اغوا کار گینگ نے یرغمال بنالیا تھا۔

شہروز سبزواری نے بتایا کہ وہ اپنی کزن مومل شیخ کی شادی کے دِنوں میں دیر رات تک کار ڈرائیو کررہے تھے کہ انہیں اچانک اغوا کاروں نے روک لیا اور گاڑی میں گُھس کر انہیں یرغمال بنالیا۔
شہروز کا کہنا تھا کہ اغوا کاروں نے ان سے موبائل اور نقدی چھین لی جب کہ ان کے پاس موجود 2 اے ٹی ایم کارڈز سے مختلف جگہوں پر لے جا کر پیسے نکلواتے رہے۔

اداکار شہروز سبزواری نے خدا کا شکر ادا کرتے ہوئے بتایا کہ ان اغوا کاروں نے اُنہیں پہنچانا نہیں کہ وہ ایک مشہور اداکار کے بیٹے ہیں ورنہ مزید نقصان بھی اُٹھانا پڑسکتا تھا۔
شہروز سبزواری نے بتایا کہ وہ چند گھنٹوں کارروائی کرتے رہے اور انہیں لوٹ کر فرار ہوگئے تاہم شہروز نے خدا کا شکر ادا کیا کہ اُن کی جان بچ گئی۔
خیال رہے کہ چند سال قبل علی ظفر اور ان کی اہلیہ کے ساتھ بھی اسی قسم کا واقعہ پیش آیا تھا۔