کراچی: شمعون عباسی پاکستانی ڈراموں اور فلموں کے سینئر اداکار ہیں۔ ماضی میں اُن کی شادیاں اداکارہ جویریہ عباسی، اداکارہ حمیمہ ملک کے ساتھ ناکام ہوچکی ہیں اور اب اُن کی چوتھی شادی منظرعام پر آئی ہے۔ اُن کی چوتھی اہلیہ اداکارہ شیری شاہ ہیں۔
شیری شاہ نے سوشل میڈیا پوسٹ میں شمعون عباسی سے اپنی شادی کا انکشاف کیا ہے۔
شمعون عباسی اور شیری شاہ دونوں نے فلم دُرج میں ایک ساتھ کام کیا تھا جسے بہت سے ناظرین نے پسند کیا تھا۔ اگرچہ فلم باکس آفس پر اچھی کارکردگی نہ دکھا سکی لیکن اس کے بعد دونوں اداکار آپس میں گہرے دوست بن گئے، ان کی شادی کی افواہیں بھی سامنے آئیں۔
تاہم اب دونوں کی شادی کی افواہیں حقیقت کا روپ دھار چکی ہیں کیونکہ شیری شاہ نے فیس بُک پر بالآخر شمعون عباسی کے ساتھ اپنی شادی کا باقاعدہ انکشاف کردیا ہے۔
سوشل میڈیا پوسٹ میں شیری نے اپنے شوہر شمعون عباسی کو مبارک باد دیتے ہوئے لکھا کہ میں آپ کے بارے میں بہت سی چیزوں کی معترف ہوں، آپ کی طاقت، آپ کی پُرسکون طبیعت، آپ کے کردار اور دیانت داری، آپ کی حس مزاح، آپ کا خوبصورتی کو سراہنے کا انداز اور آپ کی پُرلطف سنگت۔
پوسٹ میں انہوں نے یہ بھی کہا کہ آپ کی وجہ سے میری زندگی حسین ہوگئی ہے۔ جب آپ آس پاس ہوں تو ہر مشکل آسان ہے۔ میں آپ کو اپنے جیون ساتھی کے طور پر پاکر بہت خوش قسمت محسوس کررہی ہوں۔ میرے پاس موجود ہونے کا شکریہ۔ سالگرہ مبارک ہو شمعون عباسی۔