عمران حکومت کا تیسرا سال مثالی ہوگا، شیخ رشید

اسلام آباد: شیخ رشید نے کہا ہے کہ وہ اپوزیشن میں بہت سے لوگوں کو نااہل ہوتا دیکھ رہے ہیں۔
وزیر ریلوے نے اسلام آباد میں پریس کانفرنس کے دوران کہا کہ سب اپنی دو سال کی کارکردگی پیش کررہے ہیں تو ہم بھی عوام کی عدالت میں آئے ہیں، ہم ایشیا کا سب سے بڑا پروجیکٹ دینے جارہے ہیں، ایم ایل ون کے ذریعے پاکستان ریلوے جدید دور میں داخل ہوگی، ایم ایل ون 6 ارب 80 کروڑ ارب ڈالر کا پروجیکٹ ہے۔ اس منصوبے کی تکمیل کے بعد کراچی سے لاہور تک کا سفر 8 گھنٹے میں طے ہوگا۔
وفاقی وزیر کا کہنا تھا کہ وزیراعظم اور آرمی چیف پاکستان کو آگے لے کر جانا چاہتے ہیں، پہلی بار حکومت اور عسکری ادارے ایک صفحے پر ہیں، وزیراعظم عمران خان 5 سالہ مدت پوری کریں گے، تیسرا سال عمران خان کی حکومت کا مثالی سال ہوگا۔ معیشت اب ترقی کرے گی۔
وزیر ریلوے کا کہنا تھا کہ اپوزیشن جماعتیں گروہ بندی کا شکار ہیں۔ میں نے پہلے بھی کہا تھا کہ اے پی سی نظر نہیں آئے گی، محرم الحرام اور پھر ماہ صفر ہوگا مگر اے پی سی نہیں ہوگی، یہ جو باتیں کررہے ہیں یہ سارے نیب زدہ ہیں، عمران خان ان کو کسی صورت این آر او نہیں دے گا، ان کی خواہشات دل میں ہی رہیں گی۔ اپوزیشن میں بہت سے لوگوں کو نااہل ہوتا دیکھ رہا ہوں۔
شیخ رشید کا کہنا تھا کہ نواز شریف کی پارٹی میں واضح گروپنگ ہے، نواز شریف 2 کے بجائے 4 کالز کرلیں، مریم نواز کی ایک ہی خواہش تھی کہ لندن جانے دیا جائے، مایوسی پر مریم نواز نے پتھروں کا جلوس نکالا۔