ٹورنٹو/ کراچی: صحافتی خدمات کے اعتراف میں کینیڈین حکومت کی جانب سے شاہ زیب خانزادہ کو آفیشل سرٹیفکیٹ عطا کیا گیا ہے۔ پاکستانی نژاد کینیڈین رکن پارلیمنٹ اقرا خالد نے نجی ٹی وی کے سینئر اینکر پرسن شاہ زیب خانزادہ سے ٹورنٹو میں خصوصی ملاقات کی۔
اقرا خالد نے دوران ملاقات نجی ٹی وی کی مقبول ڈرامہ سیریز کیس نمبر 9 کے ذریعے خواتین کے حقوق کو اُجاگر کرنے پر اُن کی کاوشوں کو سراہا۔
اقرا خالد کے دفتر میں ہونے والی ملاقات میں شاہ زیب خانزادہ کی اہلیہ رشنا خان بھی موجود تھیں، ملاقات میں پاک کینیڈا تعلقات، کمیونٹی کے اہم مسائل اور عالمی سطح پر بڑھتی ہوئی کشیدگی کے ماحول میں آزادی اظہار اور انسانی حقوق کے تحفظ سے متعلق مشترکہ ذمے داریوں پر تفصیلی گفتگو ہوئی۔
دوران گفتگو دونوں شخصیات نے کینیڈین سیاست اور شمالی امریکا کی بدلتی ہوئی سفارتی صورت حال، خصوصاً کینیڈا اور امریکا کے باہمی تعلقات پر بھی تبادلہ خیال کیا، اس دوران پاکستانی کمیونٹی کے مسائل اور اُن کی نمائندگی بھی زیر بحث رہی۔
اقرا خالد نے گفتگو کے دوران کینیڈا کی بنیادی اقدار، باہمی احترام اور رواداری کو ایک مضبوط اور متحد معاشرے کی بنیاد قرار دیا اور کہا کینیڈا جیسے متنوع معاشرے میں ہم سب پر یہ ذمے داری عائد ہوتی ہے کہ ہم باہمی احترام، رواداری اور ایک دوسرے کی عزتِ نفس کا تحفظ کریں، اختلافِ رائے کو کبھی دشمنی میں نہیں بدلنا چاہیے۔
انہوں نے مزید کہا کہ ہماری اصل طاقت ایک دوسرے کو سننے، ایک دوسرے کی آزادیوں کا خیال رکھنے اور ایسا ماحول بنانے میں ہے جہاں ہر فرد خود کو محفوظ، باعزت اور قابلِ قدر محسوس کرے۔
پاکستانی نژاد کینیڈین رکن پارلیمنٹ اقرا خالد نے سینئر ٹی وی اینکر شاہ زیب خانزادہ کو ان کی صحافتی خدمات کے اعتراف میں حکومتِ کینیڈا کی طرف سے آفیشل سرٹیفکیٹ پیش کیا۔
دوسری جانب شا ہزیب خانزادہ نے ملاقات پر اظہارِ تشکر کیا اور اسلاموفوبیا کے خلاف آواز بلند کرنے پر اقراخالد کی کاوشوں کو خراج تحسین پیش کیا۔