بولڈ مناظر فلمانے پر صبا قمر اور نعمان اعجاز پر شدید تنقید

کراچی: صبا قمر اور نعمان اعجاز کی ویب سیریز کے بولڈ سین تیزی سے سوشل میڈیا پر وائرل ہورہے ہیں، جن پر سوشل میڈیا صارفین شدید تنقید کے نشتر برساتے دکھائی دیتے ہیں۔
سینئر اداکار نعمان اعجاز اور اداکارہ صبا قمر اپنی بہترین اداکاری کی وجہ سے انڈسٹری میں ایک نمایاں مقام رکھتے ہیں، تاہم یہ دونوں ہی ان دنوں سوشل میڈیا پر شدید تنقید کا سامنا کررہے ہیں۔
صبا قمر نے حال ہی میں فراڈ، سرِ راہ، سیریل کلر اور پاگل خانہ جیسے شاندار پروجیکٹس میں اپنی شاندار پرفارمنس سے ناظرین کی توجہ حاصل کی ہے جب کہ نعمان اعجاز بھی دنیاپور، ہم دونوں اور بسمل میں اپنی بہترین اداکاری کے باعث خوب پذیرائی حاصل کررہے ہیں۔
ان دونوں ورسٹائل اداکاروں نے مختلف ڈراموں میں بھی ایک ساتھ کام کیا ہے، جن میں اُلو برائے فروخت نہیں، جو چلے تو جان سے گزر گئے اور مسٹر اینڈ مسز شميم شامل ہیں۔
تاہم نعمان اعجاز اور صبا قمر کی ویب سیریز مسٹر اینڈ مسز شميم کے ایک بولڈ سین نے سوشل میڈیا پر تہلکہ مچادیا ہے جس میں انہیں ایک دوسرے کے بے حد قریب دیکھا جاسکتا ہے، زی فائیو پر نشر کی جانے والی اس ویب سیریز کی کہانی ایک ایسے جوڑے کے گرد گھومتی ہے جو ایڈز کا شکار ہے۔ اس سین کے منظرِعام پر آنے کے بعد سوشل میڈیا صارفین کی جانب سے صبا اور نعمان اعجاز کو شدید تنقید کا سامنا کرنا پڑرہا ہے۔
کچھ صارفین کا کہنا ہے کہ صبا قمر اور نعمان اعجاز جیسے باصلاحیت اداکاروں کو ایسے غیر اخلاقی مناظر کا حامل سین کرنے کی ضرورت نہیں تھی۔
ایک صارف نے تبصرہ کیا، مجھے لگا کہ یہ کسی نیٹ فلکس سیریز کا سین ہے، مگر افسوس کہ یہ پاکستانی اداکار ہیں۔ ایک اور صارف نے لکھا، یہ وہی اداکار ہیں جو وضو کے ساتھ گھر سے نکلنے کا دعویٰ کرتے اور اس کے بعد ایسی چیزیں شوٹ کرتے ہیں۔
سوشل میڈیا پر صارفین کی جانب سے خاص طور پر صبا قمر کو کڑی تنقید کا نشانہ بنایا جارہا ہے۔