سرگودھا سے شدید زخمی ریچھ کو ریسکیو کرلیا گیا

کراچی: سرگودھا سے زخمی ریچھ کو غیر ملکی تنظیم فور پاز نے وائلڈ لائف اتھارٹیز کے ساتھ مل کر ریسکیو کرلیا۔
فورپاز اعلامیے کے مطابق کارروائی اسلام آباد اورپنجاب وائلڈ لائف ڈپارٹمنٹ کی درخواست پر کی گئی۔
فورپاز کی جانب سے بتایا گیا کہ 7 سال کے ریچھ کے ناک میں ڈالا گیا رنگ اور گردن کی زنجیر ہٹادی گئی ہے، ریچھ کے جسم پر شدید زخم، آنکھوں، ناک اور پیٹھ پر گہرے نشانات ہیں۔
فور پاز کے مطابق غیر قانونی طور پر رکھے گئے ریچھ کو بیئر بیٹنگ کے لیے استعمال کیا جارہا تھا، بیئربیٹنگ میں زنجیر میں جکڑے ریچھ سے بھوکے بپھرے کتوں کی لڑائی کرائی جاتی ہے۔
اعلامیے میں بتایا گیا کہ بیئر بیٹنگ کھیل غیر قانونی ہے اور دنیا بھر میں اس پر پابندی عائد ہے، عدالتی حکم پر ریچھ کو تحویل میں لے کر ریسکیو سینٹر منتقل کردیا گیا ہے۔