اولڈ ایج ہوم میں ماؤں کی بے بسی اور اولاد کی بے رخی دیکھ کر دل ٹوٹ گیا، پروین اکبر

کراچی: اپنی برجستہ اداکاری کے باعث بے پناہ مقبول سینئر ٹی وی اداکارہ پروین اکبر نے اولڈ ایج ہوم کے اپنے حالیہ دورے کو انتہائی دردناک قرار دیتے ہوئے بتایا کہ وہاں دیکھے گئے مناظر نے انہیں تین دن تک شدید ڈپریشن میں مبتلا رکھا۔
نجی ٹی وی کے مارننگ شو میں گفتگو کرتے ہوئے پروین اکبر نے کہا کہ کراچی کے ایک اولڈ ایج ہوم میں ماؤں کی بے بسی اور اولاد کی بے رخی دیکھ کر دل ٹوٹ گیا۔
اداکارہ پروین اکبر کے مطابق وہاں کئی خواتین اپنی اولاد کی ایک جھلک کو ترس رہی تھیں۔ ایک پڑھی لکھی خاتون نے بتایا کہ اس کے چار بچے ہیں مگر سب نے مل کر اسے اولڈ ایج ہوم میں چھوڑ دیا، کیونکہ وہ شاید ان کے لیے بوجھ بن چکی تھی۔ نہ بیٹے رکھنے کو تیار تھے اور نہ بیٹیاں اپنے گھروں میں جگہ دینے پر آمادہ تھیں۔
پروین اکبر کا کہنا تھا کہ کچھ خواتین کی ذہنی حالت بھی اس قدر خراب تھی کہ وہ دیواروں سے باتیں کررہی تھیں۔ انہوں نے افسوس کرتے ہوئے کہا کہ سمجھ نہیں آتا کون سی اولاد اپنے والدین کو اس حال میں تنہا چھوڑ دیتی ہے۔