اسلام آباد: ملکی توانائی کے شعبے میں اہم پیش رفت ہوئی ہے، وزیرستان بلاک میں دوسرے بڑے گیس و تیل کے ذخائر دریافت ہوئے ہیں۔
رپورٹ کے مطابق ماڑی انرجیز کی جانب سے پاکستان اسٹاک ایکس چینج کی انتظامیہ کو بذریعہ خط آگاہ کیا گیا ہے کہ خیبر پختونخوا میں اسپن وام ون کنویں سے دوسری بار تیل و گیس کے ذخائر دریافت ہوگئے ہیں۔
خط میں کہا گیا ہے کہ کنویں سے ہلکے تیل اور گیس کا بہاؤ 3 ہزار 4 سو 31 پاؤنڈ فی مربع انچ ہے، کنویں سے حاصل شدہ یومیہ گیس کی مقدار 20.485 ایم ایم ایس سی ایف ڈی ہے۔
خط کے مطابق اسپن وام ون کنویں سے ملنے والے ہلکے تیل کے ذخائر کی یومیہ مقدار 117 بیرل ہے، خط کے مطابق وزیرستان میں کواگڑھ فارمیشن میں ماری انرجیز کا شیئر 55 فیصد ہے جب کہ او جی ڈی سی ایل کا شیئر 35 فیصد اور اورینٹ پٹرولیم کا شیئر 10 فیصد ہے۔
ماہرین کا کہنا ہے کہ وزیرستان بیلٹ میں تیل اور گیس کے مزید ذخائر دریافت ہونے کے قوی امکانات ہیں۔