سعودی عرب کی 110 سالہ پڑدادی اسکول میں داخل

ریاض: کہتے ہیں تعلیم حاصل کرنے کے لیے عمر کی کوئی قید نہیں ہوتی اور یہ بات سعودی عرب کی ایک 110 سالہ پڑدادی نے سچ ثابت کردی۔
سعودی میڈیا کے مطابق البیشہ گورنری سے تعلق رکھنے والی خالہ نوضاء القحطانی کی عمر 110 سال ہے، انہوں نے اپنی ادھوری تعلیم کو مکمل کرنے کے لیے تعلیم بالغان کے اسکول میں داخلہ لے لیا۔
خالہ نوضاء القحطانی کا کہنا ہے کہ جلد شادی ہونے کے باعث تعلیم ادھوری چھوڑنا پڑی تھی۔ پھر بچے ہوئے، ان کی ذمے داریاں نبھاتے نبھاتے ایک عمر لگ گئی لیکن ہر وقت تعلیم مکمل نہ کرپانے کا ملال رہتا تھا۔
110 سالہ پڑدادی نے کہا کہ میں اس موقع کی تلاش میں تھی کہ کب مجھے اس عمر میں تعلیم حاصل کرنے کا موقع مل سکے۔ حکومت نے تعلیم بالغان کا سلسلہ شروع کیا تو جیسے میرے من کی مراد بر آئی۔
خالہ نوضاء القحطانی اب اسکول میں دنیاوی تعلیم ہی نہیں بلکہ دینی تعلیم بھی حاصل کررہی ہیں اور وہ بے حد خوش ہیں کہ انہیں اس عمر میں سیکھنے کا موقع مل رہا ہے۔
ان کے اہل خانہ نے بھی اس پر مسرت کا اظہار کیا ہے۔ اسکول منتظمین بھی خالہ نوضاء القحطانی کی کارکردگی سے کافی متاثر ہیں۔