یہ میری دوسری شادی، الزام لگا تھا فیصل سے شادی کیلئے طلاق لی، ثناء

کراچی: پاکستانی ڈراموں کے صف اول کے اداکار فیصل قریشی کی اہلیہ ثناء فیصل نے انکشاف کیا ہے کہ فیصل قریشی سے ان کی دوسری شادی ہے۔
ثناء فیصل نے حال ہی میں فیصل قریشی کے پوڈکاسٹ میں بطور مہمان شرکت کی، جس میں فیصل نے اہلیہ سے اپنی پہلی ملاقات اور شادی کا سوال کیا؟
ثنا فیصل نے جواب میں بتایا کہ میری اور فیصل کی پہلی ملاقات کافی ڈرامائی تھی جس پر ڈرامہ بھی بنایا جاسکتا ہے۔
ثنا نے دوران گفتگو انکشاف کیا کہ فیصل سے شادی سے قبل میں طلاق یافتہ تھی، دوران عدت فیصل کا رشتہ میرے لیے آیا اور پھر خالہ نے مجھے اور گھر والوں کو فیصل کے رشتے کے لیے راضی کرلیا، وہ وقت میرے لیے ایک مشکل وقت تھا میں کچھ بھی نہیں کرنا چاہتی تھی، مجھ پر الزام لگایا جارہا تھا کہ میں نے فیصل قریشی سے شادی کیلئے طلاق لی اور پھر یہ سوچا کہ فیصل سے شادی ہی ان سب چیزوں سے فرار ہے، شادی کرلی اور یہی فیصلہ میرے لیے بہترین ثابت ہوا۔
ثناء کی پہلی شادی سے بھی قبل ان سے اپنی پہلی ملاقات کا احوال بتاتے ہوئے فیصل قریشی نے بتایا کہ میرے قریبی دوست کی شادی ثنا کی کزن سے ہوئی تھی، اس دوران ثنا مجھے اچھی لگیں اور میں نے ان سے بہانے سے نمبر مانگ لیا لیکن اس ملاقات میں ثنا نے مجھے اپنا نمبر تک نہیں دیا، اس کے بعد ثنا کی شادی ہوگئی اور پھر وہ چلی گئیں، جب میرے علم میں ان کی طلاق آئی تو میں نے ثنا کی خالہ کے ذریعے ایک بار پھر ان سے شادی کے لیے کوشش کی۔
فیصل قریشی نے مزید بتایا کہ ثنا سے میری شادی بہت سادگی سے اور رمضان میں ہوئی تھی، میں ثنا کو ایک جوڑے میں اپنے ساتھ لایا تھا۔
واضح رہے کہ فیصل قریشی نے 2010 میں ثنا سے شادی کی تھی جن سے ان کے دو بچے بیٹی آیت اور بیٹا فرمان قریشی بھی ہیں۔
فیصل قریشی کی پہلی شادی کم عمری میں ہوئی تھی جو طلاق پر ختم ہوئی، پہلی اہلیہ سے فیصل قریشی کی بیٹی ہانش قریشی ہیں جو شوبز میں قدم رکھ چکی ہیں۔