کراچی: نجی منی ایکسچینج کمپنی کے منیجر کو حوالہ ہنڈی کے خفیہ نیٹ ورک کے ذریعے بھارتی خفیہ ایجنسی ’را‘ کے ایجنٹوں کو رقم فراہم کرنے کے الزام میں گرفتار کیا گیا ہے۔
نجی ٹی وی کے مطابق ایف آئی اے کے انسدادِ دہشت گردی ونگ نے کراچی کے علاقے صدر سے یاسین نامی شخص کو حراست میں لے لیا۔ ملزم منی ایکسچینج کمپنی کا منیجر ہے اور اس کی گرفتاری پہلے سے پکڑے گئے ملزمان کی نشان دہی پر کی گئی ہے۔ اس کے قبضے سے لیپ ٹاپ اور موبائل فون برآمد ہوا ہے۔
ایف آئی اے حکام کا کہنا ہے کہ ملزم یاسین حوالہ ہنڈی کے بین الاقوامی خفیہ نیٹ ورک کے ساتھ منسلک تھا اور کراچی میں مبینہ طور پر بھارتی خفیہ ایجنسی ’را‘ کے ایجنٹوں کو بھجوائی گئی رقوم تقسیم کرتا رہا ہے۔
خیال رہے کہ چند روز قبل بھی ایف آئی اے نے ’را‘ سے تعلق کے الزام میں کراچی سے 3 افراد کو حراست میں لیا تھا۔ جن کی شناخت ظفر خان، سفیان اور جاوید میمن کے نام سے ظاہر کی گئی تھی۔