لاہور: دسویں جماعت کے امتحانات میں پوزیشن لینے والا طالب علم ایک روز کے لیے پنجاب کا وزیر تعلیم بن گیا۔
وزیر تعلیم پنجاب رانا سکندر حیات نے بچوں کے عالمی دن کے موقع پر اپنے عہدے کا چارج ایک دن کے لیے ایک طالب علم کو سونپ دیا۔
ننکانہ صاحب کے رہائشی ابوذر نے دسویں جماعت میں اعلیٰ پوزیشن لی تھی۔ ایک دن کا وزیر تعلیم ابوذر سرکاری گاڑی پر مکمل پروٹوکول کے ساتھ دفتر پہنچا تو سرکاری افسروں نے بھرپور استقبال کیا۔
ابوذر نے متعدد سرکاری امور نمٹائے، ان کی زیرِ صدارت تعلیم سے متعلق مختلف اجلاس بھی ہوئے۔
ایک دن کے وزیر تعلیم ابوذر نے تعلیمی معاملات اور اسکولوں میں سہولتوں کے حوالے سے بریفنگ بھی لی۔ اس دوران انہوں نے افسروں کو ہدایات بھی جاری کیں۔
وزیر تعلیم ابوذر نے اجلاس میں اسکالرشپ اسکیم، غریب بچوں کی فیس معافی، اساتذہ کے لیے ٹرانسپورٹ سہولت کی فراہمی پر مشاورت بھی کی۔
ایک روز کے وزیر تعلیم پنجاب نے پریس کانفرنس میں میڈیا کوبریفنگ بھی دی۔ ابوذر کا کہنا تھا کہ محکمے کو چلانا آسان نہیں، بہت ذمے داری والا کام ہے۔