آئیسولیشن ہسپتال کا افتتاح: عوام عیدالاضحیٰ پر احتیاط کو نظرانداز نہ کریں، وزیراعظم کی اپیل!

اسلام آباد: وزیراعظم نے قوم سے اپیل کی ہے کہ وہ عیدالاضحیٰ پر کورونا وبا سے متعلق احتیاط کو نظرانداز نہ کرے۔
وزیراعظم عمران خان نے اسلام آباد آئیسولیشن ہسپتال اینڈ انفیکشن ٹریٹمنٹ سینٹر کا افتتاح کرنے کے بعد میڈیا سے گفتگو کرتے ہوئے کہا کہ آئیسولیشن ہسپتال اینڈ انفیکشن ٹریٹمنٹ سینٹر کم دنوں میں مکمل کیا گیا جو خوش آئند ہے اور ٹیم کو مبارک باد بھی پیش کرتا ہوں۔ نیشنل کمانڈ اینڈ آپریشن سینٹر نے مشکل وقت میں اہم کام کیے ہیں۔
وزیراعظم عمران خان نے کہا کہ عوام سے اپیل ہے وہ عیدالاضحیٰ پراحتیاط کو نظرانداز نہ کریں، گزشتہ عید پر ہم نے لاپروائی کی، جس کی وجہ سے وائرس تیزی سے پھیلا، قوم سے اپیل ہے کہ وہ نہ ہو جو ہم نے گزشتہ عید پر کیا۔ قربانی سے متعلق ایس او پیز بنائے ہیں قوم سے اپیل ہے کہ ایس او پیز پر عمل کریں۔
وزیراعظم نے کہا کہ پاکستان میں کورونا متاثرین کی تعداد بتدریج کم ہورہی ہے، دیگر ممالک کی نسبت پاکستان میں اس وبا سے اموات کم ہوئیں۔
واضح رہے کہ ڈھائی سوبستروں پرمشتمل جدید سہولتوں سے آراستہ ہسپتال ریکارڈ 40 دن میں تعمیر کیا گیا ہے۔