اسلام آباد: وزیراعظم کے مشیر برائے نج کاری محمد علی نے کہا ہے کہ قومی ایئرلائن کی نجکاری سے حکومت کو 55 ارب روپے ملیں گے۔
وفاقی وزیر اطلاعات عطا تارڑ کے ساتھ پریس کانفرنس کرتے ہوئے مشیر نجکاری محمد علی کا کہنا تھا قومی ایئرلائن ایک زمانے میں بہت اچھی ائیرلائن تھی، اب تک قومی ایئرلائن کے 100 طیارے ہونے چاہیے تھے، آج قومی ائیرلائن کے صرف 18 جہاز چل رہے ہیں، پی آئی اے کے آپریشنل 18 میں سے 12 طیارے لیز پر ہیں، ایئرلائن سالانہ 40 لاکھ مسافروں کوسہولت فراہم کرتی ہے، قومی ائیرلائن کے لینڈ روٹس سب سے بڑا اثاثہ ہیں۔
ان کا کہنا تھا پی آئی اے کے ملازمین کی تعداد 6 ہزار 700 ہے اور ہفتہ وار قومی ایئرلائن 240 راؤنڈ ٹرپس کر رہی ہے، اس کے پاس کل 33 طیارے ہیں، 20 طیارے اپنے ہیں جبکہ 13 لیز پر ہیں، 24 طیارے 2010 سے پہلے کے ہیں۔
محمد علی کا کہنا تھا اداروں کی نجکاری کا عمل 20 سال پہلے 2005 میں شروع ہوا تھا، نجکاری سے قومی ائیرلائن کی عظمت رفتہ رفتہ بحال ہوگی، ماضی میں بہت غلطیاں ہوئیں، نجکاری سے سرمایہ کاری آئے گی۔
ان کا کہنا تھا حکومت کو نجکاری سے 10 ارب نہیں 55 ارب روپے حاصل ہوں گے، 10 ارب روپے کیش ملے گا جبکہ 45 ارب روپے کی حکومتی ایکویٹی ہوگی، حکومت 45 ارب روپے مالیت کے 25 فیصد حصص برقرار رکھے گی، توقع ہے کہ قومی ائیرلائن کے نئے مالکان اپریل سے قومی ائیر لائن چلائیں گے۔
انہوں نے بتایا کہ قومی ائیرلائن کی نجکاری کیلئے 6 ماہ محنت کی، ماضی میں بہت سی غلطیوں کے باعث قومی ائیرلائن کی حالت خراب ہوئی، صرف 2 طیارے 2017 کے بعد کے ہیں، قومی ائیرلائن کے پاس ڈومیسٹک مارکیٹ شیئر 30 فیصد ہے، قومی ایئرلائن گلوبل نہیں ریجنل ائیر لائن ہے اور اس کی زیادہ تر انٹرنیشنل فلائٹس مڈل ایسٹ کی ہیں۔
مشیر برائے نجکاری کا کہنا تھا 2015 میں قومی ائیرلائن کی منفی ایکویٹی 213 ارب روپے تھی، 2024 میں قومی ائیرلائن کے نقصانات 700 ارب روپے تھے، 2015 سے ہر سال نقصان میں تھے، حکومت کو نجکاری سے 55 ارب ملے گا لیکن نقصان نہیں بھرنا پڑے گا۔
وفاقی وزیر اطلاعات عطا تارڑ کا کہنا تھا اللہ کا شکر ہے آخرکار پی آئی اے پرائیویٹائز ہوئی، اس میں وزیراعظم شہباز شریف اور فیلڈ مارشل عاصم منیر کا بہت اہم کردار ہے، فیلڈ مارشل نے بھی نجکاری میں ایک اہم کردارادا کیا۔
عطا تارڑ کا کہنا تھا قومی ایئرلائن کی نجکاری شفاف انداز میں ہوئی، وزیراعظم کی ہدایت پر نجکاری کے عمل کو براہ راست دکھایاگیا، مفتاح اسماعیل کا شکریہ کہ انھوں نے قومی ائیر لائن کی بڈنگ کو ایک بہترین بڈنگ قرار دیا۔