پٹرول اور ڈیزل کی قیمتوں میں اضافے کا امکان

اسلام آباد: پٹرولیم مصنوعات کی قیمتوں میں آج سے آئندہ 15 روز کے لیے اضافے کا امکان ہے۔

ذرائع کے مطابق پٹرول کی قیمت میں آئندہ 15 روز کے لیے فی لیٹر 6.60 روپے اور ڈیزل کی قیمت میں 5.27 روپے اضافے کا امکان ہے۔

پٹرول کی قیمت میں ڈھائی فیصد اضافے کے بعد نئی قیمت 273.39 روپے فی لیٹر ہونے کا امکان ہے جب کہ ڈیزل کی قیمت میں 1.9 فیصد اضافے کے ساتھ نئی قیمت 278.25 روپے فی لیٹر متوقع ہے۔

اس تبدیلی کی بنیادی وجوہ شرح مبادلہ اور پٹرولیم لیوی (پی ایل) میں رد و بدل ہیں تاہم مٹی کے تیل (کیروسین) کی قیمت میں فی لیٹر 3.74 روپے اور لائٹ ڈیزل آئل (ایل ڈی او) کی قیمت میں 2.23 روپے کمی متوقع ہے۔

امریکی صدر ڈونلڈ ٹرمپ کے اس اعلان کے بعد کہ اگر روس نے یوکرین کے خلاف جنگ بند نہ کی تو وہ اس پر تجارتی پابندیاں مزید سخت کریں گے، بین الاقوامی منڈی میں پٹرولیم مصنوعات (پی او ایل) کی قیمتوں میں مزید اضافہ دیکھنے میں آیا ہے۔

خام تیل کی قیمتیں 71 ڈالر فی بیرل سے تجاوز کرگئی ہیں اور اگر روس نے یوکرین پر جنگ بند نہ کی تو پٹرولیم مصنوعات (پی او ایل) کی قیمتوں میں مزید اضافہ ہوگا جس کا سب سے زیادہ نقصان پاکستان جیسے درآمدی معیشت والے ملک کو ہوگا۔