اسلام آباد: پارلیمنٹ ہائوس سے چوہوں سے نجات کے لیے شکاری بلیوں سے استفادے کا فیصلہ کرلیا گیا۔
کیپٹل ڈیولپمنٹ اتھارٹی (سی ڈی اے) نے پارلیمنٹ ہاؤس میں چوہوں سے جان چھڑانے کے لیے اہم فیصلہ کرلیا۔
ذرائع کے مطابق سی ڈی اے نے چوہے پکڑنے کے لیے شکاری بلیوں کی خدمات لینے کا فیصلہ کیا ہے، جس کے لیے 12 لاکھ روپے کا بجٹ بھی مختص کیا گیا ہے۔
ذرائع نے بتایا کہ چوہے کھانے والی شکاری بلیوں کی خدمات لی جائیں گی اور چوہے پکڑنے کے لیے جالی لگی خصوصی کھڑکیاں بھی لگائی جائیں گی، سی ڈی اے چوہے پکڑنے کے لیے نجی شعبے کی بھی خدمات حاصل کرے گا۔
ذرائع کا کہنا ہے کہ پارلیمنٹ ہاؤس کی چھتوں کی سیلنگ کی وجہ سے چوہوں کی بھرمار ہے، چوہے سینیٹ اور قومی اسمبلی کے مختلف شعبوں میں نقصان پہنچارہے ہیں جب کہ چوہوں نے پارلیمنٹ کے کئی دفاتر میں فائلیں بھی کتر ڈالی ہیں۔
ترجمان قومی اسمبلی نے کہا کہ چوہوں کے خاتمے کے لیے کارروائی سی ڈی اے کرے گا۔