پارس مسرور کی والدہ اور سینئر اداکارہ بینا مسرور انتقال کرگئیں

کراچی: معروف ٹی وی اداکار اور اینکر پارس مسرور کی والدہ، پاکستان ٹیلی وژن کی سینئر اداکارہ بینا مسرور انتقال کرگئیں۔ ان کی عمر 67 سال تھی۔ یہ غم کی خبر خود پارس مسرور نے اپنے انسٹاگرام اکاؤنٹ پر اسٹوری کے ذریعے شیئر کی، جس کے بعد شوبز انڈسٹری اور ان کے چاہنے والوں میں افسوس کی لہر دوڑ گئی۔
بینا مسرور پاکستان ڈرامہ انڈسٹری کا ایک جانا پہچانا اور معتبر نام تھیں۔ انہوں نے متعدد مقبول ڈراموں جیسے بنجارا، بیٹیاں، تڑپ، عشق نہیں آسان، آنگن، اگر اور جانِ جہاں میں اپنی بہترین اداکاری کے ذریعے ایسی یادگار پرفارمنس دی جنہیں آج بھی شائقین قدر کی نگاہ سے دیکھتے ہیں۔ ان کے کردار نہ صرف فن کے حوالے سے نمایاں رہے بلکہ نئی نسل کے فنکاروں کے لیے بھی وہ ایک قابلِ تقلید مثال تھیں۔
وہ معروف شاعر اور ادیب ڈاکٹر بیدل مسرور کی اہلیہ تھیں اور سندھ یونیورسٹی سے اعلیٰ تعلیم حاصل کرنے کے بعد تدریس کے شعبے سے بھی منسلک رہیں، جہاں انہوں نے متعدد شاگردوں کی رہنمائی کی اور علمی میدان میں اپنا مثبت کردار ادا کیا۔
پارس مسرور نے اپنی والدہ کے انتقال پر انتہائی غم کا اظہار کرتے ہوئے مداحوں اور دوستوں سے والدہ کی مغفرت کے لیے دعا کی درخواست کی ہے۔ شوبز انڈسٹری کے ساتھی فنکار، دوست اور پرستار ان کے اہلِ خانہ سے تعزیت کا اظہار کررہے ہیں اور بینا مسرور کی فنی خدمات کو خراجِ تحسین پیش کر رہے ہیں۔