ٹی ٹوئنٹی سیریز میں آسٹریلیا کے ہاتھوں پاکستان کو وائٹ واش شکست

ہوبارٹ: آخری ٹی 20 میچ میں بھی آسٹریلیا نے پاکستان کو شکست دے کر سیریز 0-3 سے اپنے نام کرلی۔
ہوبارٹ میں کھیلے گئے تیسرے میچ میں آسٹریلیا نے پاکستان کا 118 رنز کا ہدف 11.2 اوورز میں 3 وکٹوں کے نقصان پر پورا کرلیا۔
ہدف کے تعاقب میں آسٹریلیا کے مارکوس اسٹونس نے 27 گیندوں پر پانچ چھکوں اور پانچ چوکوں کی بدولت ناقابل شکست 61 رنز بنائے جب کہ جوش انگلس نے 27 اور جیک فریسر نے 18 رنز کی اننگز کھیلی۔
پاکستان کی طرف سے شاہین آفریدی، عباس آفریدی اور جہانداد خان نے ایک، ایک وکٹ حاصل کی۔
قبل ازیں پاکستان نے ٹاس جیت کر پہلے بیٹنگ کا فیصلہ کیا تھا، پاکستانی بلے باز آسٹریلوی بولرز کے سامنے ریت کی دیوار ثابت ہوئے اور پاکستان کی پوری ٹیم 117 رنز بناکر آؤٹ ہوگئی۔
پاکستان ٹیم پورے 20 اوورز بھی نہ کھیل سکی اور 18.1 اوورز میں 117 رنز بناکر آؤٹ ہوگئی۔ بابراعظم 41 اور حسیب اللہ خان 24 رنز کے ساتھ نمایاں رہے۔
شاہین آفریدی 16، صاحبزادہ فرحان 9، جہاندداد خان 5، عثمان خان 3 رنز بناکر آؤٹ ہوئے۔ کپتان سلمان آغا، عباس آفریدی سفیان مقیم ایک، ایک رن بناسکے، حارث رؤف صفر کے ساتھ ناٹ آؤٹ رہے۔
آسٹریلیا کی طرف سے ایرون ہارڈی نے 3، ایڈم زمپا اور اسپینسر جانسن نے 2، 2 وکٹیں حاصل کیں۔
تیسرے ٹی ٹوئنٹی میں پاکستان ٹیم کی قیادت نائب کپتان سلمان علی آغا نے کی جب کہ محمد رضوان میچ میں شریک نہیں ہوئے۔