اسلام آباد: انڈر 19 ایشیا کرکٹ کے فائنل میں بھارت کو عبرت ناک شکست دینے کے بعد پاکستانی شاہین ایشیا کپ لے کر وطن واپس پہنچ گئے۔
اسلام آباد ایئرپورٹ پر انڈر 19 کرکٹ ٹیم کا شاندار استقبال کیا گیا، جہاں شہریوں کی بڑی تعداد رات گئے کھلاڑیوں کا استقبال کرنے ایئرپورٹ پہنچی۔
فاتح کھلاڑیوں پر پھولوں کی پتیاں نچھاور کی گئیں، پھولوں کے ہار پہنائے گئے اور گلدستے پیش کیے گئے، شہریوں نے ڈھول کی تھاپ پر رقص کیا اور خوب بھنگڑے ڈالے۔
ایئرپورٹ کے باہر آتش بازی کا بھی مظاہرہ کیا گیا، کھلاڑیوں کے شاندار استقبال کے دوران فضا پاکستان زندہ باد کے نعروں سے گونج اٹھی۔
پی سی بی کے چیف آپریٹنگ آفیسر سمیر احمد، ڈائریکٹر ہائی پرفارمنس عاقب جاوید اور دیگر پی سی بی حکام کھلاڑیوں کے استقبال کے لیے موجود رہے۔ ایئرپورٹ سے تمام کھلاڑیوں کو وی آئی پی پروٹوکول میں مقامی ہوٹل پہنچایا گیا۔
وزیراعظم شہباز شریف آج انڈر 19کرکٹ ٹیم کے کھلاڑیوں سے ملاقات کریں گے۔ ملاقات میں بھارتی ٹیم کو شکست دینے والے کھلاڑیوں کی بھرپور حوصلہ افزائی کی جائے گی۔
خیال رہے کہ پاکستان نے بھارت کو 191 رنز سے شکست دیکر ٹائٹل اپنے نام کیاہے۔