پیاز کئی امراض سے تحفظ میں معاون

کراچی: پیاز پوری دُنیا میں عام استعمال میں لائی جاتی ہے، اس کے اندر حیرت انگیز خواص ہوتے ہیں، اسے زیرِ زمین اگنے والا شفا خانہ کہا جائے تو غلط نہ ہوگا۔
ڈاکٹر ہوں یا حکیم، پیاز کو شفا بخش قرار دیتے ہیں، کیونکہ اب بھی اس کے اہم طبی فوائد سامنے آرہے ہیں۔ ان میں سے پیاز کے چند فوائد یہ ہیں۔
پیاز بہت سارے اینٹی آکسیڈنٹس کا مجموعہ ہے، جن میں قابلِ ذکر کیورسیٹن نمایاں ہونا ہے۔ یہ بدن کے اندر آکسڈیٹوو اسٹریس کم کرتا ہے۔ اس سے اندرونی سوزش کم ہوتی ہے اور کئی دیرینہ امراض کو ختم کرنے میں مدد ملتی ہے۔
پیاز میں بہت سے وٹامن، معدنیات اور دیگر ضروری اجزا پائے جاتے ہیں۔ یہ تمام اجزا صحت کے لیے انتہائی مفید ہیں۔ ان میں وٹامن سی، وٹامن بی 6، پوٹاشیئم اور فولیٹ بڑی مقدار میں موجود ہیں۔ ان تمام اجزا کی اہمیت اپنی جگہ ہے جو پیاز کو صحت کا ایک قدرتی سپلیمنٹ بناتے ہیں۔
پیاز میں موجود اجزا بلڈ پریشر کم کرنے کی غیرمعمولی صلاحیت رکھتے ہیں۔ بلڈ پریشر کم ہونے سے دل ودماغ کے پورے نظام پر مثبت اثرات مرتب ہوتے ہیں اور یوں آپ صحت مند بلڈپریشر کے ساتھ خوش گوار زندگی گزارتے ہیں۔ اس کے علاوہ دل کے دورے اور فالج کے ممکنہ حملوں سے بھی بچ سکتے ہیں۔
کئی سائنسی تحقیقات سے ثابت ہوا ہے کہ پیاز متعدد اقسام کے کینسر سے بچاتی ہے۔ ان میں نظامِ ہاضمہ اور بڑی آنت کے کینسر قابلِ ذکر ہیں۔ اس میں موجود ’کیورسیٹن‘ اور ’فیسیٹائن‘ سمیت دیگر کئی قیمتی اجزا پائے جاتے ہیں جو سرطان کے حملے کو پسپا کرتے ہیں۔ یہاں تک کہ خود سرطان کے مریض بھی اس سے فائدہ اٹھاسکتے ہیں۔
پیاز میں موجود وٹامن سی کی غیرمعمولی مقدار پورے جسم پر مثبت اثرات مرتب کرتی ہے۔ ہم جانتے ہیں کہ وٹامن سی امنیاتی نظام کو توانا کرتی ہے۔ یہ وٹامن جسم کی بیماریوں سے لڑنے کی صلاحیت کو بڑھاتا ہے۔ اسی لیے پیاز کا یہ پہلو بھی نہایت اہم ہے۔
پیاز میں فائبر(قدرتی ریشوں) کی وجہ سے پیٹ اور نظامِ ہاضمہ بہتر رہتا ہے۔ اس کے علاوہ یہ بہترین قبض کشا سبزی بھی ہے۔
سلفر اور دیگر اہم اجزا کی شکل میں پیاز حسن آور بھی ہے۔ سلفر سے بال مضبوط ہوتے ہیں اور جلد تروتازہ دکھائی دیتی ہے۔