اسلام آباد: پاکستان ورچوئل ایسٹس ریگولیٹری اتھارٹی نے بائنانس اور ایچ ٹی ایکس کو این او سی جاری کردیا۔
پاکستان کرپٹو کونسل کے اعلامیے کے مطابق این او سی اداروں کے ساتھ مشترکہ مشاورت اور باضابطہ جائزہ کارروائی کے بعد جاری کیا گیا۔
اعلامیے میں کہا گیا ہے کہ بائنانس اور ایچ ٹی ایکس کو پاکستان میں ابتدائی تیاری اور مشاورتی سرگرمیاں شروع کرنے کی اجازت مل گئی اور یہ این او سی مکمل آپریٹنگ لائسنس نہیں ہے۔
اس حوالے سے وزیر خزانہ محمد اورنگزیب نے کہا ہے کہ این او سی فریم ورک کا آغاز مالی نظم اور ذمے دارانہ جدت کے عزم کا ثبوت ہے، پی وی اے آر اے دنیا کی پہلی اے آئی سے چلنے والی ورچوئل ایسٹس ریگولیٹری اتھارٹی بن رہی ہے، اتھارٹی نے ایویلیوایشن سسٹم، ریکروٹمنٹ پورٹل، اے آئی اسسٹڈ ٹول متعارف کرادیا ہے، اس ٹول سے نگرانی کی صلاحیت میں بہتری آئی ہے۔
ان کا کہنا تھا کہ پی وی اے آر اے ریگولیٹری فریم ورک کے آئندہ مراحل آگے بڑھانے کے لیے مقامی اور بین الاقوامی اسٹیک ہولڈرز سے مشاورت جاری رکھے گی۔
چیئرمین پاکستان ورچوئل ایسیٹس ریگولیٹری اتھارٹی بلال بن ثاقب کا کہنا تھا کہ این او سی کا اجرا مکمل لائسنس یافتہ اور ریگولیٹڈ ماحول کی طرف پہلا قدم ہے، اس سے صارف کے تحفظ، مالی شفافیت اور ذمے دارانہ جدت کو بنیاد بنایا جائے گا، پاکستان کی ڈیجیٹل مارکیٹ میں ہر کمپنی کو شفافیت، گورننس اور رسک مینجمنٹ کے اعلیٰ ترین معیار پر پورا اترنا ہوگا۔
پاکستان دنیا میں کرپٹو اپنائے جانے کے لحاظ سے تیسرے نمبر پر ہے اور یہاں 3 سے 4 کروڑ صارفین موجود ہیں، پاکستان سے منسلک سالانہ ڈیجیٹل ایسیٹ ٹریڈنگ سرگرمی کا حجم 300 ارب ڈالر سے زائد ہے۔