نیویارک: ہالی وُڈ کے مشہور جوڑے نکول کڈمین اور کیتھ اربن کے درمیان قریباً 20 سال پر محیط شادی کے بعد علیحدگی کی خبروں نے فنی حلقوں کو گہرا دھچکا پہنچایا ہے۔
آسکر ایوارڈ یافتہ اداکارہ اور گریمی ایوارڈ یافتہ کنٹری گلوکار کی یہ شادی 2006 میں شروع ہوئی تھی جو اب اختتام کو پہنچ گئی ہے۔
ذرائع کے مطابق یہ جوڑا کئی ماہ سے علیحدہ رہ رہا تھا جب کہ یہ بھی بتایا جارہا ہے کہ نکول کڈمین اس علیحدگی کے خواہش مند نہیں تھیں۔ دونوں کے درمیان دو دہائیوں پر محیط رشتے میں خوشیوں اور مشکلات کے کئی لمحات شامل تھے، جو اب اپنے اختتام کو پہنچ گئے ہیں۔
نکول کڈمین اور کیتھ اربن کی شادی کے ابتدائی دور میں ہی ایک اہم موڑ اس وقت آیا تھا جب شادی کے محض چند ماہ بعد ہی اربن کو نشے اور شراب نوشی کی لت کے باعث بحالی مرکز میں داخل کرایا گیا تھا۔ اس مشکل وقت میں کڈمین اور قریبی دوستوں کی مداخلت نے اربن کی زندگی بدلنے میں اہم کردار ادا کیا تھا۔
یہ جوڑا ہالی وُڈ کی تقریبات اور پریمیئرز میں اکثر ایک دوسرے کا ساتھ دیتا نظر آتا تھا، جو ان کے باہمی تعلق کی مضبوطی کی عکاسی کرتا تھا۔ دونوں کی دو بیٹیاں ہیں۔
خیال رہے کہ نکول کڈمین کی اس سے قبل مشہور اداکار ٹام کروز سے شادی ہوئی تھی، جو 1990 سے 2001 تک قائم رہی۔ اس کے بعد انہوں نے 2006 میں کیتھ اربن سے شادی کی تھی، جو اب اپنے اختتام کو پہنچ گئی ہے۔
ہالی وُڈ میں طویل المدتی شادیوں کے حوالے سے یہ علیحدگی ایک اور نمایاں مثال بن گئی ہے، جس نے فنی برادری اور مداحوں کو حیرت و افسوس میں مبتلا کردیا ہے۔