کراچی: نگراں وزیر اطلاعات مرتضیٰ سولنگی کا کہنا ہے کہ نواز شریف جیل توڑ کر نہیں بلکہ حکومت کی اجازت سے باہر گئے، واپسی پر ان کے ساتھ قانون کے مطابق سلوک ہوگا، نواز شریف حفاظتی ضمانت لیں یا نہیں فیصلہ وہ خود کریں گے۔
نگراں وزیر اطلاعات مرتضیٰ سولنگی نے کراچی پریس کلب میں پریس کانفرنس کرتے ہوئے کہا کہ نواز شریف جیل کی دیواریں توڑ کر باہر نہیں گئے تھے بلکہ عدالت اور اُس وقت کی حکومت کی اجازت سے بیرون ملک گئے تھے، جب نواز شریف واپس وطن آئیں گے تو ان کے ساتھ آئین اور قانون کے مطابق سلوک کیا جائے گا، نواز شریف حفاظتی ضمانت لیں گے یا نہیں اس کا فیصلہ وہ خود کریں گے۔
انہوں نے کہا کہ الیکشن کرانا الیکشن کمیشن کا کام ہے اور نگراں حکومت اپنی آئینی ذمے داری کے تحت الیکشن کمیشن کی ساری ضروریات پوری کرے گی، ہم نے بدترین مارشل لا بھی دیکھا ہے اور پریس کلب کے تاریخی اقدامات بھی دیکھے ہیں، ملک میں الیکشن ہوں یا نہ ہوں، کراچی پریس کلب میں انتخابات ہمیشہ ہوتے ہیں، یہاں سے سب سے زیادہ جمہوریت کے لیے آواز اٹھتی ہے۔
انہوں نے کہا کہ صحافیوں کی بہبود ترجیحات میں ہے، آزادی اظہار رائے کے لیے کراچی پریس کلب کا اہم کردار ہے، البتہ نگراں حکومت محدود مدت کے لیے آئی ہے مگر صحافیوں کے مسائل کے لیے جو ممکن ہوا کریں گے۔
نگراں وزیر اطلاعات کا کہنا تھا کہ ماضی کے تجربات کی وجہ سے انتخابات سے متعلق کچھ لوگوں کے ذہن میں الجھن ہے اور الجھن پیدا کرنا کچھ لوگوں کا کاروبار ہے، میرے یا نگراں حکومت کے ذہن میں ایسی کوئی الجھن نہیں، الیکشن کمیشن نے اعلان کیا کہ جنوری میں انتخابات ہوں گے، امید ہے اس کی تاریخ جلد دی جائے گی۔
ان کا کہنا تھا کہ الیکشن کے موقع پر تمام رجسٹرڈ سیاسی جماعتوں کو یکساں مواقع فراہم کیے جائیں گے جب کہ آزادانہ اور شفاف انتخابات کے لیے الیکشن کمیشن کو تمام وسائل فراہم کریں گے۔
انہوں نے کہا 90 روز میں الیکشن کا کہہ کر 11 سال گزارے گئے، بہت جلد اپنی آئینی ذمے داری ادا کریں گے، ہمیں قانون سازی کا اختیار نہیں مگر مسائل حل کرنے کے لیے جو کرسکے کریں گے، 30 نومبر کو حلقہ بندیوں کی حتمی فہرست دے دی جائے گی اور یقین ہے کہ الیکشن کی حتمی تاریخ بھی دے دی جائے گی۔
انہوں نے مزید کہا اگر کوئی سمجھتا ہے کہ الیکشن کمیشن کوئی غیر قانونی اور غیر آئینی کام کررہا ہے تو اس حوالے سے عدالتیں کھلی ہیں۔