شیر کو شکست، ماں جیت گئی!

کیلے فورنیا: ماں نے بہادری کا مظاہرہ کرتے ہوئے اپنے پانچ سال کے بچے کو پہاڑی شیر کے چنگل سے بچالیا، یہ درندہ اُس کے بچے کو گھسیٹ کر لے جانا چاہ رہا تھا، ممتا جیت گئی اور جنگل کا بادشاہ شکست کھا گیا۔
اگرچہ بچے کی حالت اب خطرے سے باہر ہے، لیکن اسے زخم اور خراشیں آئی ہیں۔ تاہم کیلیفورنیا کے محکمہ جنگلی حیات نے اپنے بیان میں کہا کہ بچے پر 65 پاؤنڈ وزنی شیر نے حملہ کیا، اس کی ماں نے گھونسے مار مارکر اپنے پانچ سالہ بیٹے کو بچالیا۔
شیر کے بھنبھوڑنے سے بچے کے سر، گردن اور اوپری دھڑ پر خراشیں آئی ہیں۔ جب ماں نے اپنے بچے کے چیخنے کی آواز سنی تو وہ فوراً وہاں پہنچی اور شیر کی گرفت سے بچے کو آزاد کرالیا۔ یہ واقعہ کیلاباساس میں پیش آیا ہے۔ محکمہ جنگلی حیات نے بچے کی ماں کو ہیرو قرار دیا جس نے سوچے سمجھے بغیر شیر کو مارنا شروع کردیا۔
وائلڈ لائف کے اہلکاروں نے جائے وقوعہ کا جائزہ لیا تو ان کا سامنا اسی ’غصیلے اور حملہ آور‘ شیر سے ہوا جو بچے کو بھنبھوڑ چکا تھا۔ اہلکاروں نے اسے گولی مارکر ہلاک کردیا۔ تجربہ گاہ میں جب اس کا تجزیہ کیا گیا تو یہ حملہ آور حیوان ہی برآمد ہوا اور اس کی تصدیق ہوگئی۔
شیروں کے رویے کی ماہر اینا بیٹرز نے کہا کہ جب بھی آپ کا سامنا پہاڑی شیر سے ہوجائے تو نہ ہی پیٹھ دکھائیں اور نہ ہی دوڑیں بلکہ خود کو بڑا اور زوردار دکھانے کی کوشش کریں اگر یہ نہیں ہوتا تو اس پر کچھ اشیا پھینکیں تاکہ وہ بھاگ جائے۔