والدہ میرے لیے رحمت، بیٹے کی تنہا پرورش مشکل کام ہے، ثانیہ مرزا

دبئی: پاکستانی کرکٹر شعیب ملک کی سابقہ اہلیہ اور سابق بھارتی ٹینس اسٹار ثانیہ مرزا نے کہا ہے کہ بچے کی تنہا پرورش مشکل کام ہے۔
ثانیہ مرزا حال ہی میں بولی وُڈ ہدایت کار کرن جوہر کے ساتھ ایک انٹرویو میں شریک ہوئیں، اس دوران انہوں نے میزبان کی سیٹ سنبھالی اور کرن جوہر سے سنگل پیرنٹنگ سمیت مختلف موضوعات پر سوالات کیے۔
ایک سوال کے دوران ثانیہ نے اعتراف کیا کہ بیٹے کی تنہا پرورش مشکل کام ہے کیوں کہ ہم کام کرتے ہیں لہٰذا ہم پر مختلف ذمے داریاں بھی ہیں۔
ان کا کہنا تھا کہ میں دبئی میں رہتی ہوں اور بیٹے کو وہاں چھوڑ کر ہفتے بھر کے لیے کہیں سفر کرنا میرے لیے سب سے بڑا چیلنج ہے، کیوں کہ میں اس کو دیکھ نہیں سکتی، میری والدہ میرے لیے رحمت ہیں کیوں کہ وہ میرے بیٹے کے ساتھ ہوتی ہیں دوسری جانب باقی سب ٹھیک ہے۔
انہوں نے بتایا کہ میں نے کئی بار رات کا کھانا چھوڑ دیا کیوں کہ میں اکیلے کھانا نہیں کھاسکتی، اس صورت حال نے مجھے میرا وزن کم کرنے میں بھی مدد کی۔
خیال رہے کہ شعیب ملک اور ثانیہ مرزا کے درمیان 2024 میں طلاق ہوگئی تھی، دونوں کا ایک بیٹا اذہان مرزا ملک ہے۔