نسلی فسادات سے بیٹیاں اور ہم عمر مسلمان لڑکیاں خوف زدہ ہیں، صادق خان

لندن: لندن کے میئر صادق خان نے برطانیہ میں حالیہ نسلی فسادات اور مظاہروں کے حوالے سے لب کشائی کی ہے۔ پاکستانی نژاد صادق خان کا کہنا تھا کہ انتہائی دائیں بازو کے انتہا پسندوں کے فسادات اور مظاہروں کے باعث میری بیٹیاں اور ان کی ہم عمر مسلمان لڑکیاں خوف زدہ ہیں۔
برطانوی اخبار دی گارڈین کو انٹرویو میں میئر لندن صادق خان نے حالیہ نسلی فسادات پر پریشانی کا اظہار کرتے ہوئے کہا کہ 10 روز سے فسادات اور مظاہروں میں تارکین وطن اور بالخصوص مسلمانوں کو نشانہ بنایا گیا۔
صادق خان نے مزید کہا کہ میں دکھی ہوں، کیونکہ میری بیٹیوں کی نسل برطانیہ میں خوف محسوس کررہی ہے۔ میں بھی محفوظ نہیں۔ تمام وقت پولیس کی سیکیورٹی میں ہوتا ہوں۔
میئر صادق خان نے کہا کہ 2016 میں میئر بننے سے اب تک مجھے دھمکیاں دی جارہی ہیں۔ 15 پولیس افسران کی ٹیم میری اور میرے خاندان والوں کی حفاظت کرتی ہے۔
دھیان رہے کہ پاکستانی نژاد صادق خان کی اہلیہ 53 سالہ سعدیہ احمد اور ان کی دو بیٹیوں انیسہ اور عمارہ کو متعدد بار سوشل میڈیا پر بھی ہراساں کیا گیا۔