مولانا طارق جمیل کے اکاؤنٹس منجمد ہونے کی اطلاع پر بیٹے کا موقف

لاہور: عالم دین مولانا طارق جمیل کے اکائونٹس منجمد ہونے کی اطلاعات پر اُن کے صاحبزادے کا موقف سامنے آیا ہے، جس میں یوسف جمیل کا کہنا ہے کہ والد کے اکاؤنٹس سیل ہونے اور اربوں روپے اکاؤنٹس میں ہونے سے متعلق چلنے والی خبریں جھوٹی ہیں۔
مولانا طارق جمیل سے متعلق گزشتہ روز سوشل میڈیا پر 49 ارب چھپانے کے الزام میں ان کے اکاؤنٹس منجمد ہونے کی افواہیں سامنے آئی تھیں، جس کے بعد سوشل میڈیا صارفین کی جانب سے مولانا طارق جمیل سے آمدن اور اثاثے ظاہر کرنے کا مطالبہ کیا گیا۔
سوشل میڈیا صارفین کا دعویٰ تھا، ایف آئی اے نے مولانا طارق جمیل کے خلاف کارروائی کرتے ہوئے ان کے بینک اکاؤنٹس منجمد کرلیے ہیں، جس پر اب ان کے صاحبزادے یوسف جمیل کا ردعمل سامنے آیا ہے۔
ٹوئٹر پر جاری پیغام میں یوسف جمیل نے لکھا کہ کل سے مولانا طارق جمیل کے اکاؤنٹس منجمد ہونے کی خبریں سوشل میڈیا پر گردش کررہی ہیں اور کہا گیا کہ ان اکاؤنٹس میں اربوں روپے ہیں، اس خبر میں بالکل بھی سچائی نہیں، خدارا کسی کے بارے میں جھوٹی خبر پھیلانا بھی برا عمل ہے۔
دھیان رہے کہ یوسف جمیل کی ٹوئٹ کو مولانا طارق جمیل کے آفیشل انسٹاگرام پیچ کی اسٹوری پر بھی شیئر کیا گیا ہے۔