کراچی: کینسر کے مریضوں کو پبلک پرائیویٹ پارٹنر شپ کے تحت مفت ادویہ فراہمی کے معاہدے کی تقریب کا انعقاد کیا گیا۔
تقریب میں وفاقی سیکریٹری صحت نے بریفنگ دیتے ہوئے کہا کہ اسلام آباد، آزاد کشمیر اور گلگت بلستان کے کینسر مریضوں کو مفت ادویہ فراہم کی جائیں گی۔
ادویہ حکومت پاکستان اور ملٹی نیشنل دوا ساز کمپنی Roche کے مشترکہ تعاون سے فراہم کی جائیں گی۔ اس پانچ سالہ معاہدے کے تحت پمز اسپتال میں کینسر کے ہزاروں مریض مستفید ہوں گے۔
وفاقی وزیر صحت مصطفیٰ کمال نے کینسر مریضوں کو پبلک پرائیویٹ پارٹنرشپ کے تحت مفت ادویہ کی فراہمی کے لیے معاہدے پر دستخط کردیے ہیں جب کہ نجی دوا ساز کمپنی کی ایم ڈی نے بھی معاہدے پر دستخط کیے۔
وزیر صحت کا کہنا تھا کہ پاکستان میں ایک کروڑ تیس لاکھ لوگ مختلف بیماریوں کی وجہ سے غربت کی لکیر سے نیچے چلے گئے۔ کینسر موذی مرض ہے جس کا علاج بہت ہی مہنگا ہے۔ پانچ سال کے دوران کینسر کے ایک مریض پر 98 لاکھ روپے خرچ ہوتے ہیں۔
انہوں نے کہا کہ اس معاہدے سے پہلے آئیے پہلے پائیے کی بنیاد ہر 741 مریضوں کو فی مریض قریبا ایک کروڑ روپے مفت علاج میسر ہوگا۔ علاج کی سہولت پمز اسپتال میں اسلام آباد، آزاد کشمیر، گلگت بلتستان کے مریضوں کو میسر ہوگی۔