کراچی: عالمی شہرت یافتہ اداکارہ ماہرہ خان کی پروڈکشن میں بننے والی پہلی فلم کا پوسٹر ریلیز کردیا گیا ہے، جسے بے پناہ پسند کیا جارہا ہے۔
ماہرہ خان ڈراموں کے بعد فلموں میں بھی اپنا خاص مقام بنانے میں کامیاب رہیں۔ وہ شاہ رخ خان کے مدمقابل فلم رئیس میں بھی اداکاری کے جوہر دکھا چکی ہیں۔
منفرد انداز کی وجہ سے پہچان بنانے والی ماہرہ خان نے اداکاری کے ساتھ پروڈکشن میں بھی قدم رکھ دیا۔ اُن کی پروڈکشن میں بننے والی پہلی فلم ’بارہواں کھلاڑی‘ کا پوسٹر بھی جاری کردیا گیا ہے، جسے مداحوں کی جانب سے خوب سراہا جارہا ہے۔
ماہرہ خان نے انسٹا پر اپنی پروڈکشن کا لوگو شیئر کیا، جس کے کیپشن میں انہوں نے لکھا کہ میں بہت زیادہ پُرجوش اور گھبراہٹ کا شکار ہوں، کیوں کہ میں اپنی پروڈکشن کے پہلے منصوبے پر کام شروع کررہی ہوں۔
انہوں نے اپنے ادارے کی پہلی فلم ’بارہواں کھلاڑی‘ کا پوسٹر بھی جاری کیا، جس کی کہانی سے متعلق انہوں نے کہا کہ اس فلم کی کہانی دوستی، رشتہ، اتحاد، کامیابی، ناکامی، محبت اور حوصلہ افزائی پر مبنی ہے، درحقیقت ہم نے سخت محنت اور محبت بھری مشقت کا مرحلہ عبور کیا ہے۔ ہماری یہ کوشش آپ کے لیے ہے۔
میڈیا رپورٹس کے مطابق اس فلم میں علی ظفر کے چھوٹے بھائی دانیال ًظفر اور کنزیٰ ہاشمی مرکزی کرداروں میں جلوہ گر ہوں گے۔