ماہرہ کی وجہ سے اداکارانہ صلاحیتوں کے اظہار کا موقع ملا، ضرار خان

کراچی: حال ہی میں شوبز کی دُنیا میں قدم رکھنے والے اداکار اور ماڈل ضرار خان نے انکشاف کیا ہے کہ شوبز کیریئر کا سفر اس وقت شروع ہوا جب ماہرہ خان نے ان کی صلاحیتوں کو سراہا اور انہیں کام کی پیش کش کی۔
ضرار خان نے حالیہ انٹرویو میں اپنی زندگی اور کیریئر سے متعلق تفصیل سے بات کی اور انکشاف کیا کہ ماہرہ کی وجہ سے انہیں اپنی صلاحیتیں دکھانے کا موقع ملا۔
ضرار خان نے بتایا کہ انہوں نے ایک اشتہار میں کام کیا تھا، جس کے بعد انہیں ماہرہ خان کے ساتھ ایک فلم میں مختصر کردار ملا۔ انہوں نے مزید انکشاف کیا کہ وہ ماہرہ خان اور فواد خان کی فلم نیلوفر کا بھی حصہ ہیں، تاہم فلم کی ریلیز کے حوالے سے انہیں کوئی خاص معلومات نہیں۔
ضرار خان کے مطابق فلم کے دوران ماہرہ خان نے ان کی صلاحیتوں کو سراہا اور انہیں اپنی اسپورٹس سیریز ’بارہواں کھلاڑی‘ میں کام کی پیش کش کی، جو ان کے کیریئر کے آغاز کا سبب بنی۔
اب تک وہ نصف درجن سے زائد ڈراموں، ٹیلی فلموں، فلموں اور ویب سیریز میں کام کر چکے ہیں اور حالیہ دنوں میں ان کا کردار میم سے محبت میں کافی پسند کیا جارہا ہے جو ان کی شہرت کی وجہ بھی بن رہا ہے۔